Kuala Lumpur, Jymmang:
Ka jingiaid lynti jong ka kynhun ialehkai Badminton ka ri ha ka lympung ialehkai ba mynta ka Malaysia Super 500 tournament ka lah nang iai long kaba seisoh bad kaba jop hadien ba katto katne na ki khlur ialehkai ka ri ba kynthup ia ka PV Sindhu, HS Prannoy bad Kidambi Srikanth ki lah ioh ban buh jaka ialade ha ka rynsan iakhun quarterfinal, hadien ba ki lah khur ia ka jingjop jong ki na ki kyrdan iakhun ka jong ki.
Kumta ha kaba iadei bad katei ka bynta, ka Sindhu ka la lah ban ialehkai bha haduh ba kan da pynliem noh ia ka nongiakhun pyrshah na Japan ka Aya Ohori ha baroh shi lynter jong ki jingialehkai ha ka jingiakhun paramarwei da 21-16, 21-11. Shuh shuh ruh na ki shynrang, u Prannoy u lah hap ban tih jylliew ka rukom ialehkai bha ka jong u na ka bynta ban pynwandur biang ia ka sa shisien tad haduh ba un da rah syndon ia ka jingjop pyrshah ia u Shi Feng Li na China ha ki lai jingiakhun jong ki da 13-21, 21-16, 21-11. Hadien kitei ki jingiakhun, ka jingiakhun jong u Srikanth ruh ka lah long kaba seisoh, ha kaba u la lah ban jop pyrshah ia u lahduh India Open na ka ri Thailand u Kunlavut Vitidsarn da 21-19, 21-19. Ka jingjop ba ka Sindhu ka la lah ban khur na katei ka jingiaknieh rung quarterfinal ka long ka sienjop kaba 13 jong ka pyrshah ia ka tei ka nongialehkai na Japan ha kiba bun ki lympung ialehkai ba ki lah iakynduh. Kumta ka Sindhu kan hap ruh ban pynkhreh bha ialade na ka bynta ban iakhun sa bad ka nongialehkai ba tbit na China ka Yi Man Zhang ha ka jingiaknieh jaka sha ka semifinal.
Kumjuh ruh ha kaba iadei bad ka jingiaid lynti u Prannoy sha ka jingiakhun quarterfinal, ki khubor ki iathuh ba utei u rangialehkai un hap ban ialehkai bha shuh shuh na ka bynta ban iakynduh pat sa bad u nongialehkai na Japan u Kenta Nishimoto. Kumta ruh u Srikanth un hap ban ialehkai bha ruh na ka bynta ka jingiakynduh sa bad u nongialehkai na Indonesia u Christian Adinata. Ha kawei pat ka jingiakhun jong ki shynrang, ka khubor ka iathuh ba u Lakshya Sen u mad noh ia ka jingshah pynrem ka jong u ha u nongialehkai na Hong Kong u Angus Ng Ka Long da 14-21, 19-21 kum ka jingpynkut noh ia ka jingiaid lynti jong u Sen ha ka lympung.
