Shillong, Jymmang 25:
Uwei u briew uba la don bynta ha ka ban thok bad shukor ïa ki nongshong shnong ka jylla ban pynïoh kam da kaba leh mynleh ïalade kum u ophisar ka tnat IB jong ka Sorkar Pdeng u la shah kem noh ha ki pulit ka East Khasi Hills.
La ong ba une u briew u la ïoh ban lum haduh T.80 lak hadien ba u la thok bad shukor ïa ki nongshong shnong ka jylla ban pynïoh kam ha Secretariat, Shillong lyngba ka MPSC bad DSC.
Une u briew uba la shah kem u dei ba la tip kyrteng kum u Richard Tiplang Swer, 39 snem ka rta, bad u shong u sah ha Wahingdoh. Na ka liang ki pulit ki la ïoh ruh ban kurup ïa ka kali Bolero kaba don ïa u number ML05-Z-3007 ba la pyndait light saw, ka mobile, ka laptop bad ki kot ki sla ba donkam na ka ïingsah jong u.
Haba kyrwoh khubor ba la pyllait, u Superintendent of Police (City) ka East Khasi Hills, Bah Vivek Syiem, u la kyntu ba lada don kino kino ki briew kiba la ngat ha ki kam shukor jong une u runar, ba kin leit buh da ka ejahar pyrshah ïa u ha kino kino ki thanat kiba don marjan.
Nangta u Bah Vivek u ïathuh ba ka tnat ka la ïohpdiang ïa ka jingujor ha ka 16 tarik Jymmang 2023 ïa ka jingdon une u briew uba kam ïalade kum u ophisar ka tnat IB jong ka Ministry of Home Affairs (MHA), uba ïaid tyrwa kam ha Secretariat, Shillong lyngba ka MPSC bad DSC.
Nalor kane, u la ïathuh ruh ba une u runar u la bthah ïa une u nongmudui ba un lum ïa ka pisa na baroh ki briew kiba kwah ïa ka kam katkum ka kyrdan pule.
Nalor kata, u Bah Vivek u la pyntip ba une u nongmudui u la dep ban lum ïa ka pisa haduh T.80 lak na ki 38 ngut ki briew naduh u snem ba la dep bad la siew ruh ïa kane ka pisa sha une u runar. La ïathuh ba une u runar hadien ba la shim ïa ka pisa, u la leh kiar noh na une u nongmudui namar ka jingbym urlong ka jingpynïoh kam.
Nalor kane, u Bah Vivek u la pyntip ba ki pulit ki la ïoh pdiang biang sa kawei ka ejahar ha thanat Lumdiengjri ha ka 22 tarik Jymmang 2023, ba une u juh u runar u la kam ïalade kum u ophisar ka Police Special Branch bad kular ïa u nongmudui ba u lah ban pynïoh kam ha ka tnat Pulit halor ka kyndon ba ki nongkwah kam kin hap ban siew T.1 lak ïa ki bym pat pass matrik bad T.50 hajar ïa kiba la pass matrik.
Shuh shuh u la pyntip ba une u nongmudui u la ïathuh khana ïa kane sha ki paralok bad uwei na ki paralok u la ai lypa ïa ka pisa T.50, 000 sha une u runar lyngba u nongñiah kali jong u ha Motphran, Shillong ha u bnai Lber, 2023.
Kumta u Bah Vivek u la pyntip ba halor kane ka jingjia, ki la don ar tylli ki case ba la pynrung, kawei ha thanat Mawlai katkum ka C/No. 45(05)2023 hapoh ka kyndon 419/420 IPC pule lang bad ka kyndon 66D IT Act bad kawei pat ha thanat Lumdiengjri katkum ka C/No. 71(05)2023 hapoh ka kyndon 419/420 IPC. Ka jingtohkit ia une u runar ka la iaid shakhmat mynta.
