Shillong, Jymmang 25:
Ka NorthEast United FC ka la thung ïa u Juan Pedro Benalina na Spain kum u coach ba thymmai na ka bynta ka aïom ïalehkai jong ka Indian Super League, la pynbna kane ka klob.
Kat kum ka kyrwoh ba pyllait da kane ka klob la ong ba kane ka jingïateh kular ka long na ka bynta shisnem bad ka lah ruh ban pynjlan biang sa shisien hadien.
Utei u coach uba la 54 snem ka rta, u la long uba ju mlien ban pynïaid ïa kiba bun ki klob ha ki lai tylli ki dewbah jong ka pyrthei, kita ha Asia, Africa bad ha Europe. Katba mynta pat un shimti ïa ka lyngkor na ka bynta ka NorthEast United kaba la mad jingeh ha ki ar aïom ba la dep.
Haba pynpaw halor kane ka jingshah thung, u Benali u la ong, “Ka long ka burom kaba khraw ïa nga ban pdiang ïa kane ka kam kum u Coach ba ha khlieh duh jong ka NEUFC. Nga thrang eh ban kyntiew ïa kane ka klob sha ki kyrdan ba kham shakhmat.”
U Benali u la pynpaw halor ka jingdon ki rangïalehkai ka thaiñ shatei lammihngi ïa ki sap ïalehkai. “Ka thaiñ shatei lammihngi ka long ka jaka pdeng jong ka jingïalehkai phutbol bad ka long kum ka ïing na ka bynta ban saiñdur ïa ki rangïalehkai. Kane ka thaiñ ka long ruh kaba ïeit ïa ka jingïalehkai phutbol bad kaba don ruh ïa ki nongkyrshan. Kumta ngan pyrshang ban kyntiew ïa kane ka klob khnang ban wanrah burom ïa kane ka thaiñ.”
Ïa u Juan la kha ha Spain bad u la long u khynnah uba ju sngewtynnad ha ka kam ïalehkai phutbol naduh ba u dangrit. Kumta hadien ba u la sangeh na ka kam ïalehkai, u la shimti nyngkong kum u coach ka Las Rozas CF ha ka rta kaba 28 snem.
Naduh kane u la sdang ïa kane ka kam ha kaba u la nangkiew shaphrang ban pynïaid ïa ki kynhun ïalehkai bapher bapher na kylleng ki ri ka pyrthei bad u la shimti ruh kum u technical assistant jong ka kynhun ïalehkai jong ka Finland.
Une u manager u la don ka jingïadei bad ka Indian Super League bad uba la ju buddien ïa kane ka lympung kumba katto katne por. “Nga la ju buddien a kane ka lympung bad kumjuh ïa ki rangïalehkai kum u Hugo Boumous, Noah Sadaoui, Mourtada Fall, bad u Zaid Krouch. Ka long kaba biang eh ban ïakhun pyrshah ïa ki klob ba la shimti ban pynïaid da u Sergio Lobera, Stuart Baxter bad u Miguel Angel Portugal,” la bynrap u Juan.
