Shillong, Jymmang 25:
U manager ka West Ham United u David Moyes u la thrang ban soi ïa u khlur ïalehkai ka Manchester United u Aaron Wan-Bissaka ha kane ka aïom lyiur bad kane ka long ban pynkhlaiñ ha ka bynta kaba shadien.
Kumba ka paw ka long ka aïom kaba eh na ka bynta ka kynhun jong u Moyes ha kaba kane ka klob jong ka Premier League ka la wan ha ka kyrdan ba hynriew bad hynñiew ha ki ar tylli ki aïom ba la dep.
Kane ka klob ka la khmih lynti ban khur ïa ka jingjop kaba nyngkong na ka bynta ki 43 snem hadien ba ka la rung sha ka final jong ka Europa Conference League bad kan ïakynduh pyrshah ïa ka Fiorentina ha Prague ha ka 7 tarik u Jylliew.
Lyngba kane ka aïom ïalehkai, ka West Ham ka la khmih lynti ban ïalehkai bha hadien ba ka wan ha ki kyrdan ba kham shadien ha kaba u Vladimir Coufal um shym la lah ban ïalehkai bha, katba u Thilo Kehrer bad u Ben Johnson ki la nang hiar arsut ha ka rukom ïalehkai.
Kat kum ki khubor la ong ba u Moyes u la khmih lynti ban pynkhlaiñ ha katei ka bynta bad u la phaikhmat sha u Wan-Bissaka namar ka lawei ïalehkai jong u ha Old Trafford kam tikna shuh.
Ha kawei ka liang utei u rangïalehkai ba dang 25 snem ka rta u la khmih lynti ban mih noh na ka United namar u la shem jingeh ban ïoh mih madan ha ka kylla step na ka daw ka jingmynsaw. Katba na ka liang u Erik ten Hag uba dei manager ka Man United u la plie lad ïa u Diogo Dalot ha ka bynta kaba shadien.
Hynrei hadien ka World Cup, u Wan-Bissaka u la duh noh ïa ka lad wat la u la ïalehkai haduh 32 sien bad ban ïarap ïa ka United ban khur ïa ka jingjop ha ka Carabao Cup bad ruh ha ka final FA Cup.
Wat la katta na ka liang u Ten Hag ka la khmih lynti ban pynkhlaiñ ha ka bynta kaba shadien, hynrei kumba ka paw utei u rangïalehkai na England u dang ïai long u rangïalehkai ‘dien ba kynsai ha ka pyrthei.
Hynrei kumba ka paw mynta kane ka lynti ïaid ka jong u ha ka kam ïalehkai na ka United ha kaba ka lawei jong u Wan-Bissaka ka lah ban kut noh watla ka kontrak ka jong u kan kut haduh u 2024. Kumta kane ka klob ka lah ban die noh ïa u wat la u dang don jingkyrmen ban pynjlan sha shisnem ha ka jingïateh kontrak.
