Aizawl, Jymmang:
Ha ka shithi ba la phah sha baroh ki district education officer, sub-divisional education officer bad sha baroh ki principal jong ki skul sorkar ka jylla, ka tnat Pule Puthi (School Education) jong ka jylla Mizoram ha ka Sngi Balang ba la dep ka la bthah ïa ki bor pynïaid distrik bad ïa ki bor pynïaid skul ba kin ailad ïa ki khynnah skul kiba na ka jylla Manipur ba kin ïoh ban pynrung kyrteng ha ki skul sorkar jong ka jylla lada kitei ki khynnah kin wan wad bad kyrpad na ka bynta ban pynrung kyrteng.
Kum ban shu ïathuh hangne la ïathuh ba hadien jong ka jingmih jong ki jingïakajia ha ka jylla Manipur, ki la don da ki spah ngut ki khynnah skul kiba la hap ban wan rieh tngen hapoh u pud u sam jong ka jylla Mizoram.
Kat kum ka jingpynmih hukum jong u Director ka tnat Pule Puthi jong ka jylla Mizoram – Lalsangliana u la kyrpad ïa baroh ki bor pynïaid distrik bad skul ba kin ailad ïa ki khynnah na ka jylla Manipur ba kin ïoh ïa ki lad ban pynrung kyrteng ha ki skul sorkar jong ka jylla Mizoram, watla na ka liang kitei ki khynnah kim lah ban pynbiang ïa ki kot ki sla ba donkam.
Kat kum ka jingïathuh jong u President ka Mizo Zirlai Pawl (MZP) – Lalnunmawia Pautu u la pyntip ba ka seng ha ryngkat ka jingïatreilang bad ka sorkar jylla ka la shim da ki sienjam kiba kyrpang ban khmih bniah halor ka mat kaba ïadei bad ka jingwan rung jong ki nong Manipur shapoh u pud u sam jong ka jylla Mizoram.
Kat kum ka jingpyllait kyrwoh na ka tnat Kam Pohïing jong ka jylla Mizoram ka la pyntip ba ha ki 48 kynta kiba la dep, ki la don haduh 123 ngut ki nong Manipur kiba la wan ban rung shapoh u pud u sam jong ka jylla Mizoram. Ka tnat sorkar ka la pyntip shuh shuh ba tad haduh kane ka kynti ba mynta ki la don haduh 7,928 ki nongshong shnong ka jylla Manipur kiba dei na ka kynhun jaitbynriew Zo/Mizo kiba la wan ban rieh tngen ha ki shnong bapher bapher kiba don ha ki 9 tylli ki distrik jong ka jylla Mizoram.
Ka tnat Kam Pohïing jong ka sorkar jylla ka la pyntip ruh ba ki don haduh 2,744 ngut kiba la leit ban rieh tngen ha ka thaiñ Kolasib district (markhap bad ka jylla Assam), 2,610 ngut ha ka thaiñ Aizawl district bad 2,229 ngut ha ka thaiñ Saitual district. Ka la pyntip shuh shuh ba ki 345 ngut kiba sah ki la leit ban rieh tngen ha ka thaiñ Champhai, Khawzawl, Serchhip, Mamit, Lunglei bad Hnahthial district.
Dang ha ka 25 tarik kaba dei ka sngi ba u Amit Shah u la leit ban jngoh ïa ka jylla Assam u la pyntip ruh ba na ka liang ka jong u, un sa leit ban jngoh ïa ka jylla Manipur na ka bynta 3 sngi. Ïa katei u la pyntip ha ka por ba u la leit ban ai jingkren ha ka jingïalang kaba la pynlong ha Srimanta Sankardev Kalakhetra kaba don ha ka nongbah Guwahati, Assam. Kat kum ki jingïoh lum jingtip la ïathuh ba ha ka jingleit jngoh jong u Amit Shah ïa ka jylla Manipur, un sa pynlong ruh ïa kawei ka jingïalang kaba kyrpang bad baroh ki lad trei kam bapher bapher jong ka jylla Manipur.
