Shillong, Jymmang 25:
Uwei u rangbah uba shong ba sah ha Lawmali, Shillong u la wan kyrpang da kaba shong ha ka ‘Wheelchair’ ban khublei kti bad u President ka Voice of the People Party (VPP), u Bah Ardent Basaïawmoit, hajan ka Additional Secretariat ha ka Sngi Thohdieng.
Une u rangbah u dei uba la tip kyrteng kum u Bah Felix Kharsati uba duna ha ka dkhot met namar um don shuh ka lbong baroh ar tylli.
Haba ïakren bad u Bah Felix u la ong haba u la ïohi tang ha YouTube ïa ka jingshah thngan u Bah Ardent um sngewhun ba un shu peit tang lyngba ka Mobile Phone, hynrei u la kwah ban wan ai khublei markhmat. Kumta u khun u jong u, u la wan ïalam naduh jaka ba u sah haduh ban da poi ha jaka shong shah thngan u Bah Ardent.
“Nga sngewthuh ba u kham shitom u Bah Ardent ban ïa nga uba wan da ka ‘Wheelchair’ haba u shah thngan namar u ïakhun na ka bynta ka pateng ban wan,” u la ong.
U la pynpaw ka jingsngewhun ka mynsiem haba u la ïoh ban khublei kti ïa u Bah Ardent bad un duwai ba un dang lah ban ïakhun ïa kane ka jingmyntoi jong ka jaitbynriew.
Shuh shuh u la ong ba ka jingkwah ka jong u ban wan ai khublei ïa u Bah Ardent ka dei namar u sngewsynei ïa la ki jong ki khun ki kti lada kim ïoh ïa ka kam kaba biang.
Ha kane ka sngi ka Ribhoi Dorbar hapoh ka jingïalam u Bah RB Shadap kum u President ki la wan ban ai mynsiem lang ïa u Bah Ardent.
Nangta ki paidbah ka shnat Hima Nongwah Mawtamur, Sohïong Lyngdohship, kaba hap ha Jirang konstitwensi ha Ri Bhoi hapoh ka jingïalam u Bah Estansing Jana Nongbet ki la leit ai da ka jingrwai hakhmat u Bah Ardent katba u dang shong shah thngan.
