Agartala, Jymmang:
Khyndiat sngi hadien ba u Myntri Rangbah ka jylla Tripura – Manik Saha u la kyntu ïa ki nongkitkam jong ka seng BJP ba kim dei ban khot donburom da ka kyntien ‘Syiem’ (Maharaja) ïa u Chairman jong ka TIPRA Motha – Pradyot Kishore Manikya Debbarma, ki kynhun ba ki seng trai muluk bapher bapher jong ka jylla Tripura kynthup ïa ka seng TIPRA Motha ki la pynlong da ki jingïakhih kiba jur ha ki distrik bapher bapher jong ka jylla Tripura.
Kat kum ki jingïoh lum jingtip la ïathuh ba na ka liang u Hangsa Kumar Tripura – dkhot jong ka TIPRA Motha district council, u la pynlong da ka jingïaïaid paidbah ha ka miet jong ka sngi Balang ba la dep ha ka shnong Khumulwng – ka shnong kaba hap hapoh u pud u sam jong ka Tripura Tribal Areas Autonomous District Council (TTAADC).
Kat kum ki jingïoh lum khubor la ïathuh ba ha ka jingïalang jong ka seng BJP kaba la pynlong ha ka 21 tarik mynta u bnai ha ka shnong Charilam, Sepahijala district, u Dr. Saha u la bthah ïa ki nongkitkam jong ka seng ba kim dei ban khot don burom da ka kyntien ‘Syiem’ (Maharaja) ïa u Pradyot Manikya.
Halor katei ka jingjia, na ka liang ki paidbah nongshong shnong ka jylla kiba dei ki nongkyrshan jong ka Tipramatha ki la pyntip ba u Pradyot u la lah ban pyndep ïa shibun ki kamram kiba dei na ka bynta ka bha ka miat jong ki paidbah nongshong shnong trai muluk jong ka jylla bad na ka liang ka jong ki, kin dang ïai bteng la junom ban khot donburom da ka kyntien ‘syiem’ ïa u.
Halor katei ka jingjia la ïathuh ba na ka liang ki seng trai muluk jong ka jylla ki la pynbna ban pynlong da ka jingïakhih kaba jur halor katei ka jingkheiñ poh jong u Myntri Rangbah pyrshah ïa u Pradyot. Haba phai sha kawei pat ka liang, na ka liang u Pradyot Debbarma u la ïawer ïa baroh ki seng saiñ pyrthei kiba don ha ka liang pyrshah ba kin ïatylli lang kawei khnang ba yn ïoh ban pynliem ïa ka seng BJP ha ka ilekshon shiteng samoi ka ban sa pynlong ha ka thaiñ Sepahijala district.
Ha ka jingpyllait kyrwoh jong u Pradyot Debbarma la pyntip ruh ba ka kam saiñ hima ka dei ka kam kaba jakhlia hadien ka jinglap ka jong u ïa kawei ka ‘video’ kaba pyni ba ki don katto katne ngut ki nongïalam jong ka TIPRA Motha kiba thmu ban leit pynïasoh ïalade bad ka seng BJP. Ha ka jingpyllait kyrwoh, na ka liang u Pradyot Debbarma u la pyntip ba u kheiñ burom kyrpang ïa u Myntri Rangbah ka jylla, hynrei naduh ba kit ka ilekshon Ïing Dorbar Thaw Aiñ kim shym la don satia kino kino ki nongmihkhmat kiba la kren ne mih shakhmat na ka bynta ka bha ka miat jong ki paidbah nongshong shnong trai muluk. U la pyntip ruh ba dei tang ma u u ba la kren na ka bynta ka bha ka miat jong ki nongshong shnong trai muluk.
