Islamabad, Jymmang:
Ha ka Sngi Palei, la ong ba sa 3 ngut kiwei pat ki nongialam jong ka seng Pakistan Tehreek-e-Insaf (PTI) ki la mih noh napoh jong ka seng hadien ki kynrum- kynram kiba la mih bad pynthoh bria ia ka seng da ka kyrteng jong u nongialam ba hakhlieh duh jong ka PTI u Imran Khan, uba long ruh u Myntri Rangbahduh barim jong ka Pakistan ha ki snem ba la leit. Kumta la ong ba kiba bun ki nongialam jong katei ka seng, ki la mih noh bad kim kwah shuh ban dang bud ia u Khan naduh ba jia ka jingïakynad ha ka 9 tarik jong une u Jymmang ha ka por ba la kem ia u Imran Khan.
Ka Maleeka Bokhari ha ka jingialang bad ki lad pathai khubor hapoh Islamabad ha katei ka sngi, ka la ong ba ka pynrem jur ia kitei ki jingleh kam thombor bad jingleh pynkheiñ aiñ jong ki nongkyrshan ka seng PTI kumba la iohi ia kaba la jia ha ka 9 tarik u Jymmang bad ka long ruh ka bym sngew iahap eiei ruh watla ki nongkyrshan ki ieid bad kyrshan ia u Imran Khan haduh katno ruh. Kumta ruh haba iadei pat bad ka jingmih noh jongka napoh ka seng PTI, ka la ong ba baroh ka dei hi da ka mon sngewbha jongka ba kam kwah shuh ban iadon bynta ha ki kam jong ka seng PTI bad ym shym la don ba pynbor ne ba phah ia ka ban mih noh.
Namar kumba ka nongïasaid aiñ, ka la ong ba ka kwah ban leh kaei kaei kaba bha naka bynta ka Pakistan bad ka kwah ruh pat ban pynlut por ha iing ha sem bad la ki khun ki kti bad ki bahaiing- hasem.
Ka Bokhari ka la mih noh na ka seng PTI tang hadien katto katne kynta ba la pyllait noh na ka patok ha Adiala Jail, ha kaba ka la shah kem bad shah pynngat hapoh ki kyndon jong ka Section 4 hapoh ka Maintenance of Public Order.
Kumta, la ong ba ka Bokhari ha katei ka jingialang bad ki lad pathai khubor, ka la ai jingkyrshan ia ka jingdawa jong ki bor pyniaid ka Pakistan ban phah tohkit bniah halor katei ka jingjia kaba la jia ha ka 9 tarik u Jymmang bad ka la ong ruh ba kitei kiba don kti baroh ha katei ka jingkulmar ki dei ban shah pynshitom katkum ki kyndon aiñ ba la buh bad dei ruh ban pynngat kyndon katkum ki jingleh pynkheiñ aiñ jongki hi.
Namar shisien ba la kam palat pud, dei ruh ban ai jingsneng bad ban pynshitom katkum ka aiñ.
Kumjuh ruh ha kawei pat ka jingkren bad ki lad pathai khubor, u Cheema u la ong ba ma u bad ka kurim jong u, kim lah shuh ban dang ai jingkyrshan ia ka seng PTI naduh ba la iohi ia kiei kiei kiba la jia ha kine ki sngi bad ba ki nongkyrshan jong ka PTI ruh kim burom shuh ia ki aiñ bad ia ki bor ba halor.
Kumta ruh u la ong ba lada ki nongkyrshan jong ka seng ki la leh palat ia ka aiñ bad ki la nud ruh ban pyni da ka bor bad ban thombor pyrshah ia ki rai jong ka sorkar, kata hi ka la kdew shai ia ka jingshah rem noh jong ka seng bad ka seng kan nym lah shuh ban khyllie khlieh biang lada long ha kane ka rukom.
Kumjuh ruh u Myntri ka tnat pla tyngka barim jong ka Pakistan, u Asad Umar u la hiar shuki bad ieh noh ia ka kam kum u Secretary General jong ka seng Pakistan Tehreek-e-Insaf (PTI) hadien ba u la lait na patok Adiala Jail ha ki khyndiat sngi ba la leit. U Umar u la pynbna ia katei ka rai ba khatduh jong u dei ha ka jingialang bad ki lad pathai khubor hi kaba la long hapoh National Press Club jong ka nongbah Islamabad ha ka Sngi Balang.
