Imphal, Jymmang:
Ka kynhun runar kaba don ïa 10 ngut ki suba dkhot jong kawei ka seng kieng atiar na ka jaitbynriew Kuki ha ka 25 tarik mynta u bnai ka la leit ban rahbor ïa uwei u briew bad lute ruh na kawei ka ‘farm house’ kaba don ha ka shnong Chirik Loitong – ka shnong kaba hap hapoh ka jingkhmih jong ki bor pulit ka Sekmai PS.
Kat kum ki jingïoh lum khubor la ïathuh ba ki dkhot jong katei ka kynhun kieng atiar ki la wan na ka shnong Thingsat Kuki bad rung ha ka shnong Chirik Loitong na ka bynta ki kam beaiñ jong ki. Ki dkhot jong katei ka seng kieng atiar nalor ka jingdonkti ban rahbor ïa uwei u briew, ki la donkti ruh ban rong tuh ïa ki katto katne tylli ki masi na kawei ka ‘farm house’ kaba don ha katei ka thaiñ.
Hynrei hadien katei ka jingjia, la ïathuh ba na ka liang ki bor pulit ki la leit ban pynlong ïa ki jingkhynra kiba jur bad ïoh ban pyllait noh ïa u rangbah u ba kitei ki runar ki la rahbor.
Ïa ka jingleit khynra ha katei ka sngi la pynlong da ka kynhun pulit na Imphal West District Police hapoh ka jingïalam jong u SP Imphal West – Dr S Ibomcha Singh, bad kumjuh ruh da ka kynhun pulit CDO ba la ïalam khmat da u DSP CDO/IW Y Kishorchand bad u officer-in-charge jong ka Sekmai Police Station – Inspector Ng Johnson.
Na ka liang ka kynhun pulit ka la ïoh ban pyllait ïa utei u rangbah na kawei ka shnong kaba don marjan bad ka thaiñ Chirik Loitong. Ïa ka jingleit khynra la leit ban ïashim bynta lem ruh da ki nongshong shnong jong ka thaiñ Mapao Khullen bad Khongnangpokpi Kom.
U rangbah u ba ki bor pulit ka thaiñ ki la ïoh ban pyllait im u dei uba la tip kyrteng kum u Kshetrimayum Manihar Singh (83 snem ka rta). Ha kawei ka liang la ïathuh ba ki dkhot jong katei ka seng kieng atiar ki la rong tuh ïa katto katne ki masi bad ki blang bad na ka liang ki bor pulit ki la pynrung da ka mokotduma na ka bynta ban pynlong ïa ki jingtohkit kiba dang sah.
Haba phai sha kawei pat ka khubor la ïathuh ba na ka liang ki nongshong shnong ka thaiñ Mapao Khullen hapoh ka jingïalam jong u Livingstone Zimic, DSP ba la shongthait ki la lah ban leit on ïa ki 6 ngut kiwei pat ki briew sha Sekmai PS hashwa ban jia kino kino ki jingjia ba sngewsih.
Haba phai sha kawei pat ka liang, la ïathuh ba ka jylla Manipur ha kane ka kynti kaba mynta ka dang don hapdeng ka jingshong syier kaba jur na ka daw jong ka jingïai bteng jong ki jingïakajia ha ki thaiñ bapher bapher jong ka jylla.
