Shillong Jymmang 26:
Hadien ka jingshah kem uwei u briew uba leh mynleh ïalade kum u heh ophisar ka tnat syntiat lane ka Intelligence Bureau (IB) ka Sorkar Pdeng, ki la nang paw pyrthei shuh shuh ki kam bym dei kiba u la leh, bad une u briew u dei uba la shah kem teng ha u snem 2014 namar ka jingthok jong u bad leh mynleh ïalade kum u shakri Sorkar.
Kum ka jingbuddien, U Nongsaiñ Hima u la ïakren bad u SP (City), u Bah Vivek Syiem ha ka Sngi Thohdieng halor ka jinglap ki pulit ïa ki kam bym dei bad kam runar kiba la leh da une u briew.
Une uba shah kem la ithuh kum u Richard Tiplang Swer, 39 snem ka rta, halor ka jingshah ujor ba u la thok ïa bun ngut ki briew bad u la lum ïa ka pisa kumba T.80 lak da kaba kam ba un pynïoh kam ha Secretariat, Shillong lyngba ka MPSC bad DSC Haba kylli la ki dang don shuh kiba ujor pyrshah ïa une u briew, u SP (City) u la ong ba ka pisa kaba u la thok ka dang kham bun shuh shuh namar ki dang don kiwei pat kiba wan mih ban ujor kum na thaiñ Mawlai.
U Bah Syiem u la ong ba ym pat lah ban leit ïalam ïa une u briew sha Ïingkashari ha ka Sngi Thohdieng namarba u la kem pang bad don ha jaka sumar.
“Ngim pat ïoh ban tohkit bniah bad ynda la dep ban pan por na ka Ïingkashari ban tohkit ïa u, ki lah ban sa nang mih shuh kiei kiei,” u la ong.
Ka jingkylli ka long, hato kita kiba kloi ban pynbam pisa ïa une u briew kin shahkem lang ne me namar maki ruh ki ngeit ban ïoh kam da kaba shu thong pisa?
U Bah Syiem u la ong ba kine ki briew kiba ujor ki dei kiba shah thok ha une u briew namarba u dei ma u uba leit sha ki ban tyrwa kam da kaba kam ïalade ba u don ha ka kyrdan ophisar (IB) bad pan pisa na kita kiba u thong ban pynïoh kam.
Haba kylli shuh shuh ïa ka jinglong jingman jong une u briew, u Bah Syiem u la ong ba une u briew u la pyndep ka jingpule haduh Klas-XII bad u sah ïingwai ha Wahingdoh.
“Une u briew u la leh ïa kane ka kam ban leh mynleh kum u IB ophisar la kumba shisnem ei ei,” la ïathuh u Bah Syiem.
Ki pulit ki la kurup ïa ka Bolero kaba u pyndonkam nalor ki kot ki sla kynthup ïa ka IB manual.
“Une u briew u la wad jingtip bha shaphang ka IB bad u ju leit borabor sha Delhi ban pynngeit ïa ki briew ba u dei uta u IB ophisar. Wat ka kurim jong u ruh ka ngeit ba u dei u IB ophisar,” la ong u Bah Syiem.
Shuh shuh la ïathuh ba une u Richard Tiplang Swer u la shah kem teng ha u snem 2014 halor ki kam thok ha kaba u la leh mynleh kum u nongtrei Sorkar, bad u la thok da kyrteng kum u Jonathan Sohkhlet.
Kumta u la ong ba ka jingtohkit ka dang ïaid bad yn sa pan ban thep ïa u along ban ïoh por ban tohkit shuh shuh.
