Athens, Jymmang:
Na ka lympung ialehkai kaba dang long mynta ha Greece ka International Jumping Meeting, ka jingshimbynta da ki nongialehkai na India ka lah long kaba seisoh, ha kaba u Murali Sreeshankar bad Jeswin Aldrin ki la lah ban pynurlong halade kum kiba nyngkong bad ba-ar na ka bynta ka kynhun ialehkai Long Jump ka ri ha katei ka lympung ialehkai; kaba long ka rynsan World Athletics Continental Tour Bronze Level.
Kumta ha kaba iadei bad katei ka bynta, u Sreeshankar u la lah ban khur shalade ia ka takma Ksiar ha ryngkat bad ka aiom ialehkai kaba seisoh ka jong u da 8.18m ha ka jingpyrshang kaba khatduh. Shuh shuh ruh utei u rangialehkai uba lah khur takma Rupa ha ka Commonwealth Games ha u snem ba lah dep ha Birmingham, u lah sdang ia ka jingiakhun ha katei ka lympung da kaba kynthih ha ka jingjngai kaba 7.94m; ha shuwa ba un thaw ia ka rekod da 8.17m, 8.11m, 8.04m bad 8.01m ha ki jingpyrshang ba hadien.
U long ruh uba lah khur ia ka takma Ksiar ha u snem ba lah dep da ka jinglah ban kynthih bha ha ka jingjngai kaba 8.31m.
Ka khubor ka iathuh ruh ba u Jeswin u lah wan ba-ar bad khur ia ka takma Rupa da 7.85m na katei kajuh ka jait jingialehkai. Utei u nongialehkai u lah sdang ia ka jingiakhun da 7.81m ha shuwa ba un kynjoh sha ka bynta ba biang eh ha ka jingpyrshang kaba ar.
Kumta ruh ki lai pyrshang ba hadien ki jong u ki long da 7.74m, 7.74m bad 7.79m. Shuh shuh u Jeswin u lah thaw ruh ia ka rekod ba thymmai ha ka ri da 8.42m ha ka Indian Open Jumps Championships kaba dang shu dep long mynta u snem ha u bnai Lber. Da katei ka jinglah kynthih jngai ka jong u, utei u nongialehkai u lah shah jied ruh sha ka World Athletics Championship 2023 ka ban sa long naduh ka 19-27 tarik u Nailar bad ka qualifying standard na ka bynta ban jied ia ki nongialehkai ka long 8.25m.
