Shillong, Jymmang 26:
U President ka seng VPP, u Bah Ardent Miller Basaïaw -moit ha ka Sngi Thoh-dieng u la ong ba u Myntri ka tnta pule puthi, u Rakkam A Sangma, u dei ban batai shai balei u kren ïa ki kyntien ban ong ba ka VPP ka ïalehkai ïa ka ding bad ba kan sa pyning ïa baroh.
Haba ïakren bad u Bah Ardent katba u dang shong shah thngan kaba la ïaid la saw sngi hakhmat Additional Secretariat u la ong ba ma u ryngkat ka seng ka dang dawa ban pynthymmai ïa ka bhah thungkam thungjam, hynrei u Rakkam u la kynthoh pynban ba ka VPP ka ialehkai bad ka ding.
“Nga kwah ba une u Myntri ka sorkar jylla u dei ban batai shai balei u kren kumne namar kane ka long kumba pyntieng ne pynsmiej ïa ki paidbah ka jylla,” u la ong.
U la ong ba ka jingkren u Rakkam ka dei ka jingmut kaba sniew sha lyndet katba kum ka seng ka dang ïakhih kaba jai jai.
Lah ban kdew ba ha ka Sngi Palei, u Rakkam u la maham ba ka VPP ka ïalehkai bad ka ding ka ban sa pyn ing ïa baroh.
U Rakkam, haba kyntu ïa u Bah Ardent, u la ong ba un kiar na ka jingpynbteng ïa ka jingshong shah thngan ba khlem pud namar kane ka lah ban wanrah ïa ka jingktah kaba jur bha.
“Ngi ïalehkai bad ka ding mynta bad kan sa pynpdung ding ïa baroh, kynthup ïa ka VPP. Kan sa pynjot ïa ka lawei jong ki khun samla jong ngi,” ong u Rakkam halor ka jingïakhih u Bah Ardent.
Haba ther ïa ka VPP, u Rakkam u la ong, kum kane ka jingleh politik bad ka drama kan sa buh ïa ka jylla ha ka jingeh kaba khraw. “Ngi ïalehkai bad ka ding bad kan sa pyning ïa baroh,” la ong u Myntri.
Shuh shuh u Bah Ardent u la ong ba ka jingwan tuid ki paidbah ban wan ai mynsiem ïa u ha kine ki saw sngi ka long shisha kaba ai mynsiem ïa u ban shong shah thngan ha kane hi ka jaka.
“Haduh mynta ym pat don ki MLA ne ki seng saiñpyrthei ba kin kyrshan ban pynthymmai biang ïa ka bhah thungkam namar kine ki pdiang ïa ka jingwanrah ka sorkar ïa kata ka Roster System,” u la ong.
Halor ka jingwan ka Myntri sorkar, ka Kong Ampareen Lyngdoh, u Bah Ardent u la ong ba ka la wan ban kyrpad ban sangeh noh ïa ka jingshah thngan bad ban wan ïakren bad ka sorkar. Hynrei u la ong ba u la kyntait mardor namar ka seng ka la rai ba kan ïaid beit shakhmat tad haduh ba ka sorkar kan pynthymmai ïa ka bhah thungkam thungjam.
Ha ka juh ka por u la ong ba lada ka Kong Ampareen ka wan kum ka riew shimet kam lah ban khot sha ka miej ka jingïakren.
Katba ka Kong Ampareen ka la pynpaw ba ka jingwan ka jong ka ha kane ka jaka ka long kum ka nongshong shnong kaba sngewkhia halor ka jingshah thngan u Bah Ardent bad ban kyrpad ïa u ban sangeh noh ban wan sha ka miej ka jingïakren bad ka sorkar.
Ha ka por mynsngi u Myntri ka sorkar jylla u Bah AL Hek u la wan ban jngoh ïa u Bah Ardent namar u shim ba u dei u paralok naduh ba u ïatreilang bad u ha ka seng FKJGP bad haduh ba un da long kum u MLA.
Ha ka juh ka por u Bah Hek u la ong ba kano kano ka bynta kaba leh na ka bynta ka jingmyntoi u paidbah ka dei kaba bha.
Haba ïakren bad u Bah Ardent u la ïathuh ba u Bah Hek u la wan jngoh ïa u kum u riew paidbah ym kum u Myntri sorkar namar u khlem kren eiei halor ka bhah thungkam thungjam.
U la kyntu ïa ki para MLA ne ki Myntri sorkar haba ki wan ban peit ïa u ki dei ban ai jingkyrshan ïa kane ka jingdawa ban pynthymmai ïa ka bhah thungkam thungjam.
