Shillong, Jymmang 26:
Ka Hynñiewtrep Integrated Territorial Organization (HITO) ha ka Sngi Thohdieng ka la leit ai da ka jingujor sha ki pulit ka thanad Sadar halor ka ‘jingjah’ jong ki lai ngut ki MLA.
Ka seng lyngba u Education Secretary, u Bah Arnold Nongdhar, ka la pyntip da ka jingthoh sha ki pulit ba ka HITO ka la ïoh ïa ki jingpyntip na ki jaka bapher bapher ba ki briew ki la leit ban ïakynduh ïa ki MLA ha ki shnong kiba kine ki MLA ki mihkhmat na ka bynta ban leit ban ai ïa ka shithi sha ki bad ban rah ruh ïa ka mat halor ka bhah thung kam thung jam hapoh ka jylla, hynrei kine ki MLA kim shym la don ha ki ïing sah jong ki.
Kumta ka HITO ka la leit ban ïakynduh hi ïa kitei ki MLA kiba sah ha nongbah Shillong, kiba kynthup ïa u MLA ka Sohra, u Bah Gavin Mylliem, u MLA ka Mawhati, u Bah Charles Marngar, u MLA ka Ranikor, u Bah Pius Marweiñ, bad ïa u MLA ka Mawsynram, u Bah Olan Sing Suiñ.
Hynrei la ong ba ki dkhot ka HITO ki la ïoh ban ïakynduh tang ïa u MLA ka Mawsynram, u Bah Olan Sing Suiñ, bad ka seng ka la pyntip ba kitei ki lai ngut kiwei pat ki MLA ki la jah na ka shnong kaba ki shong ki sah.
Kumta ka seng, ka la pynpaw ba kum ki nongshong shnong kiba la thep ‘vote’, ki sngew ba ki jingkular kiba la khlei da ki MLA sha ki paidbah ha ka por ilekshon ki dei ban urlong.
Shuh shuh, ka seng ka kyntu ïa ka tnad pulit ba lada ki lap lane ïoh jingtip halor kitei ki MLA, ki dei ban pyntip sha ka seng khnang ba kan lah ban leit ai ïa ka shithi ha kaba ïadei bad ka bhah thung kam thung jam.
