Guwahati, Jymmang:
Ki bor pulit jong ka jylla Assam ki la pyntip ba ha ka sngi Balang kaba la dep, uwei u nongkhaïi u la shah siat ïap ha ka shnong Bilasipara, Dhubri district, Assam na ki daw jong ka jingmih ki jingïakajia kiba ïadei bad ka pisa pilaiñ.
U nongkhaïi u ba la shah siat ïap ha katei ka sngi u dei u ba la tip kyrteng kum u Baser Ali – u nongkhaïi u ba bna nam tam ha katei ka thaiñ.
Kat kum ka jingïathuh jong ki bor pulit ka thaiñ, ki la pyntip ba u Ali u la shah siat hajan ka shnong Bhairabganj (Bilasipara) bad u la khlad noh hashen hashwa ban ïoh ïa kino kino ki la jingïarap kiba paka. La ïoh jingtip ruh ba hadien katei ka jingjia, na ka liang ki runar ki la phet krad noh bak na katei ka jaka.
Halor katei ka jingjia, la ïathuh ba na ka liang ki bor pulit ki la pynsdang da ki kam tohkit bad ïoh ruh ban kem ïa ki 3 ngut ki runar ïa kiba la suba jur ba dei ma ki kiba donkti ha katei ka kam beaiñ.
Watla na ka liang ki bor pulit kim pat shym la lah ban pyntikna ïa ka daw halor katei ka jingjia, hynrei ki la suba jur ba katei ka jingjia ka la jia na ka daw jong ka jingmih ki jingïakajia ha ki kam pisa pilaiñ. Na ka liang ki bor pulit la ïathuh ba ki la ïoh ruh ban tam ïa ki katto katne tylli ki snep kuli na katei ka jaka bad mynta ki dang pynlong ïa ki jingtohkit ban lap sa ïa ka pistol kaba ki runar ki la pyndonkam ban siat ïap ïa u Ali.
