Chennai, Jymmang:
Na ka liang jong ka Amateur Kabaddi Federation of India (AKFI) ka lah pynbna khubor mynta ia ki kyrteng ba khatduh jong ki 14 ngut ki dkhot ialehkai jong kawei ka kynhun ialehkai Kabaddi ka ri na ka bynta ka jingia aireng jong ki ha ka 11th Asian Kabaddi Championship 2023; ha kaba katei ka lympung ialehkai kan sdang naduh mynta ka sngi (27 tarik) haduh ka 30 tarik jong une u bnai ba mynta ha Busan, South Korea.
Ha kaba iadei bad katei ka bynta, ki katto katne ngut ki Raider ba seisoh bad ba pawkhmat jong ka Pro Kabaddi League; kata u Pardeep Narwal bad u Deepak Niwas Hooda kim shym la lah ban pynurlong ialade ban iadonlang bad katei ka kynhun ialehkai ka ri. Ha katei ka lympung ialehkai ka ban long, yn sa sakhi ruh ia ka jingwanphai biang sha ka kam ialehkai u Pawan Sehrawat ha ka sien kaba nyngkong biang naduh ba ym shym la ialehkai shuh naduh u Risaw 2022 hadien ba u lah mynsaw.
Ka kynhun Raider kan sa sei madan ruh ia u Aslam Inamdar bad Mohit Goyat bad kumjuh ruh u nongialehkai ba paw ka Patna Pirates u Sachin.
Ka khubor ka iathuh ruh ba ki rynsan pyrshang na bynta ban jied ia ki nongialehkai sha katei ka lympung lah dep ban pynlong ha ka taiew ba lah dep ha Patliputra Sports Complex; Patna, Bihar. Kumta na katei ka rynsan ba lah dep pynlong, u Surender Gill, Surender Nada, Girish Maruti Ernak, Siddharth Desai, Maninder Singh, Ravinder Pahal bad Mahender Singh ki long katto katne ki nongialehkai ba paw ki bym shym la shah jied ban iadonlang bad katei ka kynhun ba mynta. <
Kumba ka paw ka long ba ka kynhun ialehkai Kabaddi jong ki shynrang ka ri ka ju iai long ka kynhun kaba seisoh bad ba jop ha ka Asian Kabaddi Championships; ha kaba katei ka kynhun ka la lah ban khur haduh 7 tylli ka takma Ksiar ha ki phra bynta ba lah dep pynlong jong ka lympung bad ka bynta ba khatduh lah pynlong ha Gorgan, Iran kata ha u snem 2017; ha kaba ka India ka lah pynliem noh ia ka Pakistan ha ka jingiakhun phainal jong ki da 36-22 na ka bynta ban rah ia ka nam lahduh ha ka lympung.
Ka kynhun ialehkai bapura jong ka ri ka ban ia aireng ha katei ka lympung ban wan ka kynthup:
Arjun Deshwal, Pawan Sehrawat, Naveen Kumar, Sachin, Aslam Inamdar, Mohit Goyat, Sunil Kumar, Parvesh Bhainswal, Nitin Rawal, Nitesh Kumar, Surjeet Singh & Vishal Bhardwaj
Standby players:
Vijay Malik & Shubham Shinde.
