London, Jymmang:
Na ka liang jong ka International Cricket Council (ICC) ka pynbna khubor ha kaba iadei bad ka song pisa na ka bynta ka jingiaid lynti ka shalyntem jong ka World Test Championship 2021-23. Kumta ha kaba iadei bad katei ka bynta, ka jingthoh ba lah pynmih da ki nonpyniaid bahakhliehduh jong katei ka synjuk ka iathuh ba ki khyndai kynhun ialehkai ha katei ka lympung kin ioh ban iasam ia ka song pisa kaba haduh T.31.4 klur, kaba long kajuh ka song pisa kum ka shalyntem ba lah dep jong katei ka lympung ialehkai; kata jong u snem 2019-21.
Shuh shuh ruh ka khubor ka iathuh ba ka India ka ban iakhun pyrshah ia ka Ausralia ha ka WTC Final ha ka jngia aireng jong ki ha ka madan ialehkai kaba ha London ka Lord’s ka ban sdang naduh ka 7 tarik jong u bnai ban wan.
Kumta ha kaba iadei bad katei ka bynta, na ka liang jong ki nongpyniai ki iathuh ba ka kynhun ba rah ia ka nam jingjop ha ka lympung, kan ioh ban khung shalade ia ka song pisa kaba haduh T.13.22 klur katba ka kynhun kaba wan ba-ar kan ioh ban khur ia ka song pisa kaba haduh T.6.61 klur.
Ha kaba iadei bad ka khubor ba lah pyllait da ka ICC ka long ba kam shym la don kano kano ka jingpynkylla ha kaba iadei bad ka khusnam song pisa jong ka lympung, naba mynta ka iaisah kumjuh kum ha ka bynta ba nyngkong jong katei ka lympung ialehkai ha ka jingiaid lynti ba nyngkong ka jong ka; kata ha u snem 2019-21 ha ryngkat bad ka song pisa baroh-lin ha ka jingkhein kyllumlang kaba lah kot sha ka $3.8 million (T.13.22 klur.
Kumta ruh ha katei ka lah shalyntem jong ka lympung kaba lah dep ban long, u rangialehkai ka New Zealand u Kane Williamson u lah shah pynkhamti da ka song pisa kaba haduh $1.6 million (T. 6.61 klur) ha ka jingialehkai ba lah pynlong ha Southampton ha u snem 2021 hadien ba ka kynhun ka lah rah ia ka jingjop da 8 wiket pyrshah ia ka India ha ka jingiakhun phainal ha ka lympung kaba lah mad ia ka jinghap slap ba hynriew sngi lyntei.
Kumjuh ruh ka South Africa kaba lah duh noh ia ka jaka ha ka jingiakhun phainal ha ka lympung bad shong ha ka jaka balai ha ka miej khein dor-thong, kan ioh ban khung ia ka song pisa kaba T.3.72 klur.
Kumta ruh ka England kaba lah ioh ban rung sha ka lympung bad pyndep ha ka jaka ba saw kan khur ia ka song pisa kaba $350,000 (T.2.9 klur_).
Ka Sri Lanka kaba long napdeng ki kynhun ialehkai kiba lah wan shakhmat ha ka jingiakhun na ka bynta ka jaka ha ka rynsan, ka pyndep mynta ha ka jaka ba san na ka bynta ban kamai haduh $200,000 (T.1.65 klur), katba ki kynnhun ialehkai kiba sah kata ka New Zealand (No.6), Pakistan (No.7), West Indies (No.8) bad Bangladesh (No.9) kin shah pynkhamti da ka song pisa kaba mar $100,000 (T. 82.7 lak).
