Jowai, Jymmang 26:
Ka ‘result’ jong ka Secondary School Leaving Certificate bad Higher Secondary School Leaving Certificate ba la pynbna da ka MBoSE ha ka Sngi Thohdieng ka la wanrah ïa u soh bathiang ha Rilum Jaiñtia ha kaba la don haduh 7 ngut ki khynnah na ki san tylli ki skul kiba la rung ha ka thup Top 20 bad Top 10.
Ha ka SSLC ki skul kiba paw ki dei ka North Liberty Higher Secondary School kaba la sei lai ngut ki khynnah, bad ka Q. C. Springside English Secondary School, ka KJP Synod Mihngi Higher Secondary School bad ka Little Star Secondary School, Ladrymbai East Jaiñtia Hills District kiba la sei mar uwei ne kawei.
Ka Adventist Higher Secondary School, Thadlaskeiñ ka la sei ïa ka Larisa Lamin da kaba wan nyngkong ha ka thup jong ka Top 10 jong ka HSSLC (Arts).
Na ka skul North Liberty Higher Secondary School, Jowai, ka Reesa Ee Christine Suting kaba la wan haka kyrdan 11, u Mendelson M Langstang ha ka kyrdan ba 14, bad ka Rilanaika Sari kaba la wan ha ka kyrdan 20 ryngkat.
Ka Q. C. Springside English Secondary School, Jowai ka la sei ïa ka Sanikawan Challam haka kyrdan 13 ryngkat katba ka Little Star Secondary School, Ladrymbai ka la sei ïa ka Emika S Dkhar ha ka kyrdan kaba 17.
Ka K.J.P. Synod Mihngi Higher Secondary School pat ka la sei ïa u Dalammi Dauni Rymbai uba la wan haka kyrdan 20 jong ka thup Top 20.
Na kine ki hynñiew ngut ki khynnah la ïoh lad ban ïakynduh ïa ki saw ngut na ka skul North Liberty Higher Secondary School kiba kynthup ïa u Mendelson M Langstang, ka Rilanaika Sari, u Dalammi Dauni Rymbai na ka skul KJP Mihngi Higher Secondary School bad ka Larisa Lamin na Adventist Higher Secondary School Thadlaskeiñ.
Haba ïakren bad ki khynnah skul jong ka North Liberty Higher Secondary School kynthup u Mendelson Langstang bad Rilanaika Sari halor ka jingpynkhreh jong ki ïa ka eksamin, nyngkong eh ki la pynpaw ïa ka jingsngewkmen bad ainguh ïa U Blei kumjuh ïa ki kmie ki kpa bad khamtam eh ki nonghikai kiba la hikai ïa ki ym tang ha ki jingpule hynrei ka akor burom haduh ba kin da poi ha kane ka thong. Ki la ïathuh ba ki ju mlien ban khreh bad pule kot naduh ba sdang jong u snem.
U Dalammi Dauni Rymbai u la ïathuh ba u ju pynlut por san kynta man ka sngi ban pule kot bad ha ka por eksamin u ju pynlut khan bun kynta.
U Vice Principal ka KJP Synod Mihngi Higher Secondary School u Wanmi Passah u la ïathuh ba ha une u snem la don 64 ngut ki khynnah kiba ïakhun ïa ka eksamin SSLC, bad kiba ïoh 1st Division ki don 27 ngut bad ha ka 2 nd Division ki don 34 ngut.
Katba haka HSSLC u la ïathuh ba ki khynnah kiba ïakhun ïa ka eksamin ki don haduh 156 ngut, kynthup 11 ngut kiba wan haka 1st Division, 52 ngut haka 2nd Division bad 29 ngut haka 3rd Division bad 12 tylli ki Distinction.
U Bah Richard Uriah, Principal ka skul North Liberty Higher Secondary School, u la pynpaw ïa ka jingsngewkmen kaba khraw ïa ki lai khynnah kiba wanrah nam ym tang ïa ka skul, hynrei khamtam ïa ki kmie ki kpa.
U la ïathuh ki khynnah kiba ïakhun ïa ka eksamin SSLC ki don 94 ngut bad kiba ‘pass’ ki long 93 ngut kynthup 64 ngut kiba wan haka 1st Division, 17 ngut haka 2nd Division, 12 ngut haka 3rd Division ryngkat ki 154 tylli ki ‘distinction’.
Katba ha ka ‘result’ HSSLC, ki khynnah kiba ïakhun ïa ka eksamin ki don haduh 61 ngut bad pass lut baroh khoit, kiba wan 1st Division ki don 28 ngut, 2nd Division ki don 21 ngut, 3rd Division 12 ngut bad 44 tylli ki ‘distinction’.
