Kohima, Jymmang:
Ki bor sorkar jong ka jylla Nagaland ha ka 25 tarik mynta u bnai ki la pyntip ba uwei u nongïalam jong kawei ka seng ki samla pule u la shah pynïap ha ki runar ïa kiba la suba jur ba ki dei ki dkhot nong kawei ka kynhun khaïi droks.
Katei ka jingjia ka la jia ha ka shnong Tizit, Mon district jong ka jylla Nagaland ha ka step jong ka 25 tarik mynta u bnai.
U nongïalam jong ka seng ki samla pule u ba la shah pynïap ha ki runar u dei u dkhot jong ka seng Tizit Area Students’ Union (TASU) ïa u ba la tip kyrteng kum u Ahoa Konyak.
Kat kum ki jingïoh lum jingtip la ïathuh ba u Konyak u dei u action chairman jong ka TASU.
Halor katei ka jingjia, na ka liang ka TASU ka la bthah ïa baroh ki trai dukan kiba don ha ka shong Tizit ba kin khang khyrdep lut baroh ha ka 25 bad 26 tarik mynta u bnai, kum ka dak ban kynmaw burom na ka bynta u nongïalam ka seng u ba la shah pynïap.
Haba phai sha kawei pat ka khubor, la ïathuh ba na ka liang ki bor pulit jong ka jylla Nagaland hadien ka jingtohkit ka jong ki la ïathuh ba ki la ïoh ban kem ïa uwei u runar u ba la donkti ha katei ka kam beaiñ.
Kat kum ki jingïohlum khubor la ïathuh ba na ka liang u Ahoa Konyak lem bad 2 ngut ki dkhot jong ka TASU ki la leit ban jurip ïa ka kyntoit Phantom colony kaba don ha ka shnong Tizit, hadien ka jingïoh lum jingtip shaphang ka jingdon jong katto katne ngut ki nongkhaïi droks ha katei ka thaiñ.
Dei ha ka por ba kitei ki nongïalam jong ka TASU ki la poi ha katei ka shnong ba ki suba nongkhaïi droks ki la thombor da ka wait pyrshah ïa ki nongïalam jong ka TASU. Na katei ka jingshah thombor la ïathuh ba u Konyak u la ïoh ïa ki jingmynsaw kiba jur bad tang hadien katto katne kynta u la khlad noh na kane ka sla pyrthei.
Hadien katei ka jingjia la ïathuh ba ki nongshong shnong jong ka thaiñ Tizit ki la mih paidbah ban pynpaw ïa ki jingpynrem jong ki halor katei ka jingjia bad na ka liang ki ‘riew paidbah kiba la sat sia ki la leit ban wiang ding ruh ïa ka ïing sah jong uwei u runar u ba la donkti ha katei ka kam beaiñ ïa uba la tip kyrteng kum u Menshan Konyak.
