Shillong, Jymmang 26:
Ka jingpynbna risol jong ka Meghalaya Board of School Education(MBOSE) ha ka Sngi Thohdieng ha ka Secondary School Leaving Certificate(SSLC) bad kaHigher Secondar School Leaving Certificate(HSSLC-Arts)ka la pynlong ïa ki kmie ki kpa ba kin ïakren halor ka bhah thungkam thungjam lane ka ‘Reservation Policy’kaba ka Sorkar ka donkam ban pynbeit mardor khnang ba ka lawei ki khun ki kti jong ki kan ym shah ktah bad ba ka tarajur kan ym nohshiliang sha kawei pat ka jaidbynriew.
Haba ïakren bad ukpa jong ka Avelyne Francisca Khriam kaba la ïoh rung ha ka kyrdan kaba 2 ha ka thup ‘Top-10’ jong karisol HSSLC-Arts, u la ong ba ka bhah thungkam thungjam kam dei shuh ka mat kaba dang myntahynrei ka dei kaba la don ka jingsngewkhia naduh ki por ba la leit.
“Ha kaba ïadei bad ka ‘Reservation Policy’, kane kam dei shuh ka mat kaba dang mynta-mynne hynrei ka dei kaba baroh ki la sngewkhia naduh ki por kiba la leit bad bun tylli ki snem. Nga sngew ba ka donkam ban pynbeit ïa kane ka ‘Reservation Policy’,” la ong utei u rangbah.
U la ong ba ka long kaba donkam ban pynbeit ïa ka bhah thungkam thungjam namarba ka la ïakhleh lang hajuh bad ka ‘Educational Quota’ kaba la ktah bha ïa ki samla ka jaidbynriew kiba don ka jingthmu ban pule ha ka liang ki laiñ kiba kham shalor katba kiwei pat ki jaidbynriew kiba duna ha ki ‘mark’ ki ïoh ban pule bad pyndep ïa ka jingpule jong ki ha kitei ki laiñ.
“Ngi lah ban ïohi ba kiba bun ki khynnah kiba nang ba stad ha ki por bad ha ki snem kiba la leit, ki la duh lad ban pule ïa ka ‘Engineering’ ne doktor tang namarba kim kot ïa kata ka ‘Quota’ ne ka bhah kaba don katba kiwei pat kiba duna ïa ki ‘mark’ khlem da ñiew ïa ki, ki ïoh ban pule bad pyndep ïa ka,”u la ong.
Utei u rangbah u la ong ba ka Sorkar ka dei ban khmih ïa kane ka bynta khnang ba ki khun samla ka jaidbynriew kin ym duhnong bad kino-kino ki khynnah kiba wan na ki longïing-longsem kiba duk kin ïoh ïa ka lad ba kin pule shakhmat.
Haba kylli hato u aijingkyrshan ne em ïa u Bah Ardent Miller Basaïawmoit, President ka Voice of the People Party(VPP) uba shong shah thngan halor ka jingdawa ba ka Sorkar ka dei ban pynbeit ïa ka bhah thungkam thungjam, utei u rangbah u la ong ba kano-kano ka jingïakhih kaba long na ka bynta ka jingbha jong u paidbah bad jong ka jaidbynriew, baroh uwei-pa-uwei u nongshong shnong u dei ban don ka jingkyrshan bad ban don ka jingai mynsiem.
“Ngi donkam ïa ka jingïatai bad kam dei ban shu kut noh tangba ong ban pynbeit ïa kane ka bhah thung kam, hynrei ka donkam ruh ban ïatai namar ngi ïakhleh lang bad kiwei pat ki jaidbynriew kiba don ryngkat bad ngi bad ngim lah ban ieh ïa ki hynrei ngi donkam pat ban ïatai ha kata ka rukom ba ka dei ban long kaba biang hapdeng jong ngi,” u la ong.
