Shillong, Jymmang 26:
Ka Meghalaya Board of School Education (MBOSE) ha ka Sngi Thohdieng ka la pynbna ïa ka risol jong ka eksamin Secondary School Leaving Certificate (SSLC) bad Higher Secondary School Leaving Certificate (HSSLC-Arts).
Haba phai sha ka SSLC, ka jingdon jong ki khynnah pule kiba ‘pass’ mynta u snem ka long 51.93%.
Baroh ki khynnah pule kiba ïakhun ïa kane eksamin ki don 51,280 ngut ba kynthup ïa 29,486 ngut ki kynthei.
Na kitei ki 51 hajar tam, ki khynnah pule kiba la ‘pass’ ha ka SSLC ki don 26,629 ngut ba kynthup ïa 11,115 ngut ki shynrang.
Na kane ka jingkheiñ hangne, la kdew shai ba ka jingdon jong ki khynnah pule kiba ‘pass’ ha baroh 5 tylli ki distrik ka Ri-Lum Garo kam shym la kot wat ïa ka 40%.
Haba ïanujor bad u snem ba la dep, ka jingdon jong ki khynnah pule kiba ‘pass’ ha kane ka eksamin ka long 51.93%.
Ha kawei pat ka liang, haba phai sha ka risol jong ka eksamin Higher Secondary School Leaving Certificate (HSSLC-Arts) kaba la pynbna ha kane hi ka sngi, ka jingdon jong ki khynnah pule kiba ‘pass’ ka long 80.30%.
Baroh kiba la ïakhun ïa katei ka eksamin ki don 25,437 ngut ba kynthup ïa 10,203 ngut ki shynrang.
Na kitei ki 25 hajar tam, ki khynnah pule kiba ‘pass’ baroh ki don 20,425 ngut.
Ka jingdon jong ki khynnah pule kiba ‘pass’ bun eh ha ka HSSLC-Arts ka dei ha Eastern West Khasi Hills – 91.64%, katba kiba duna eh ki dei ha South Garo Hills – 49.23%.
Haba phai sha kiwei-kiwei ki distrik, ka jingdon jong ki khynnah kiba ‘pass’ ha East Khasi Hills ka long 89.93%, West Khasi Hills – 90.96%, Ri-Bhoi – 88.04%, West Garo Hills – 66.80%, East Garo Hills – 74.92%, South West Khasi Hills – 76.73%, West Jaiñtia Hills – 81.46%, East Jaiñtia Hills – 71.79%, North Garo Hills – 65.15% bad South West Garo Hills – 67.59%.
Ha u snem ba la dep, ka jingdon jong ki khynnah pule kiba ‘pass’ ha kane ka eksamin ka long 81.17%.
