Shillong, Jymmang 26:
U Khamkhrawkupar Sohtun uba na ka shnong Pomlakrai, Rngi Shillong uba don jingduna ha ki dkhot met u la wan ha ka kyrdan ‘Second Division’ ha kaSecondary School Leaving Certificate (SSLC) napdeng ki 26 ngut ki khynnah skul kiba la ïakhun ïa katei ka eksamin na Lum Shyllong Higher Secondary School, Pomlakrai.
U Khamkhrawkuparu dei u khynnah uba don jingduna ha ki kti bad u hap ban pyndonkam ïa la ki kjat haba u leh ïa kano-kano ka kam wat ban thoh jingthoh. Hynrei kane kam shym la pynduh mynsiem ïa u namar u long u khynnah uba trei shitom bad minot thop khamtam haba ïadei bad ka jingpule jong u. “Nga sngewkmen bad nga ainguh ïa u Blei uba la ïarap ïa nga ban ‘pass’ ha kane ka eksam. Ka jingburom ka leit ruh sha i Mei i Pa,” ong u Khamkhraw haba ïakren bad ‘U Nongsaiñ Hima’.
Haba kylli halor ka jingpynkhreh jong u ïa kane ka eksamin, u la ong ba um shym la don kano-kano ka jingeh haba u pule kot.
“Ngan bteng biang ïa ka jingpule jong nga ha kane ka skul,” u la ong.
Ha kajuh ka por,u Khamkhraw u la ïoh ‘Distinction’ ruh ha kawei ka sobjek ha kaneka eksamin.
U Principal ka skul, u Bah Dylan Q.Kharbuli u la ïathuh ba u Khamkhraw u long u khynnahuba trei shitom bad uba tista bha ban wan sha skul.
Haba kdew ba ka skul ka la leh katba lah ban pynkhreh ïa ki jingdonkam jong u, u la ong,”U long u khynnah uba nep bad watla u don ka jinglehraiñ haba u wan nyngkong, hynrei ngi la ai mynsiem ïa u haduh ba u la long kumba long lem kiwei pat ki khynnah skul.”
U BahKharbuli u la ong ba ka jingtrei shitom jong u Khamkhraw ka pynlong ïa u ban poi sha ka thong jong ka jingjop bad u khmih lyntiruh ba un nang leh bha shuh-shuh ha ki eksamin ki ban wan.
“Na ka liang jong nga hi, ngam kheiñ ïa u kum uba don jingduna ha ki dkhot met, hynrei u long kumba long lem kiwei ki khynnah,” u la ong.
Haba pynsngew ba u long u khynnah uba kyrpang, u Principal u la kyrpad ïa ka Sorkar ba kan leh eiei na bynta jong u ynda u la pyndep ïa ka klas XII.
Haba jubab, u la ong, “Ka Sorkar ka dei ban peit lem ïa ki skul ha ki nongkyndong naba kam dei kaba suk ban pynïaid hi shimet khamtam ïa ki klas IX-X bad XI-XII. Ki nonghikai ha la i tulop barit ki ai ka jingshakri kaba paka tam.”
Ha kawei ka liang, u kpa u Khamkhraw, Bah Dapbor Nongdhar u la ong ba u dap da ka jingkmen bad jingsngewsarong ba u khun jong u un poi shaduh kane ka kyrdan watla u long uba pher na kiwei pat ki khynnah.
“Kum u kpa nga dap da ka jingsngewkmen kaba khraw na bynta u khun uba la pyndep ïa ka eksamin.Nga ainguh ïa u Blei uba plie ka lad ka lynti. Ka burom kaba khraw ka leit ruh sha kane ka skul, ki nonghikai, ban pynpoi sha ka thong jong ka jingjop,” u la ong.
U la bynrap ba ha ka por ba u Khamkhraw u dang rit, kum ki kmie ki kpa ki la duh jingkyrmen bad rit mynsiem hynrei da ka jingtyllun ki sngi ki snem, ki la ïohi ba u khun jong ki, u khlaiñ bha ka jingmut jingpyrkhat.
Shuh shuh haba pynpaw ba ka jingshakri ka long kaba kham kyrpang ïa u Khamkhraw, u la ong ba kum u kpa u hap ban shim ka jingkitkhlieh ïa la u khun bad u kyrmen ba u soh ka jingtrei shitom un sa urlong shisien ka sngi.
