Guwahati, Jymmang:
Hadien ba ki bor pulit jong ka thaiñ Lakhimpur hapoh ka jingïalam jong u SP ba thymmai ka thaiñ – Anand Mishra ki la leit ban pynlong da ki jingkhynra kiba jur pyrshah ïa ki kynhun runar kiba ju donkti ha ki kam khaïi tuh ïa ka ksiar bad ïa ki pisa thok, la ïathuh ba ha ki 48 kynta kiba la leit noh ki la don haduh 32 ngut ki runar kiba la wan ban aiti noh ïalade hakhmat ki bor pulit.
Napdeng ki 32 ngut kiba la wan ban aiti ïalade hakhmat ki bor pulit u dei u Ajgar Ali, u ba ka kmie jong u ka la donkti ban leit pynrung FIR pyrshah ïa ka puit SI Junmoni Rabha ban kynnoh ba katei ka heh pulit ka la donkti ha ki kam dawa pisa beaiñ. Kum ban shu ïathuh hangne, la ïathuh ba ka Junmoni Rabha ka la duh ei ïa la ka jong ka jingim ha ka jingjia ïatakhuh kali ha ka taiew kaba la dep.
Kat kum ka jingïathuh jong ki bor pulit ki la pyntip ba ka thaiñ Lakhimpur ka dei kawei na ki 4 tylli ki distrik jong ka jylla Assam kaba kynrei tam ha ki kam khaïi bad pynïaid ïew beaiñ ïa ka ksiar bad ïa ki pisa thok. La ïoh jingtip ruh ba ki 32 ngut ki runar ki la wan ban aiti noh ïalade hadien ba u DGP ka tnat pulit Assam – GP Singh u la pynmih da ka jingmana kaba jur pyrshah ïa ki runar kiba ju donkti ha ki kam beaiñ. Shuh shuh na ka liang u SP ka thaiñ Lakhimpur – IPS Anand Mishra ha ki khyndiat sngi kiba la dep u la pynmih ruh da ka jingmana ba ka tnat pulit kan shim da ki sienjam kiba tyngeh pyrshah ïa ki runar kiba ju donkti ha ki kam beaiñ.
