Shillong, Jymmang 26:
Ka long ka jingkmen kaba khraw ïa ka skul St. Edmund’s Higher Secondary School, Shillong ba sa shisien kane ka skul ka la paw biang ha ka risol Higher Secondary School Leaving Certificate(HSSLC-Arts) hadien ba ka Meghalaya Board of School Education(MBOSE) ka la pynbna ïa kaha ka Sngi Thohdieng.
La ban pynkynmaw ba ka skul St. Edmund’s ha ka sngi ba ka MBOSE ka la pynmih ïa ka risol kata ha ka 9 tarik u Jymmang, katei ka skul ka la paw bha ha ka liang ka tnad pule Science bad Commerce kumjuh.
Ha kane ka kynti kaba mynta ruh, katei ka skul ka la ïoh biang ka nam ka burom hadien ba ki khynnah pule katei ka skul ki la mih kyrteng ha ka thup jong ka ‘Top-10’ ha ka tnad pule Arts bad ki kyrdan kiba katei ka skul ka la ïoh ki kynthup ïa ka kyrdan kaba 2 ba la ïoh da ka Avelyne Francisca Khriam, ka kyrdan kaba 5 ba la ïoh da u Arman Suchiang, ka Talinungsang Imchen, ka Ankita Das bad ka Ankita Kar kiba la ïoh ha ka kyrdan kaba 6, ka Kelhousanya Kuotsu ha ka kyrdan kaba 9 bad ka Riwaka Tangsong ha ka kyrdan kaba 10.
Haba ïoh ban ïakren bad kawei ka samla Khasi, ka Avelyne Francisca Khriam kaba la ïoh ïa ka kyrdan kaba ar, ka la khublei kyrpang ïa u Blei uba la don ryngkat bad ka, ïa ki kmie ki kpa, ïa ki nonghikai skul bad ïa ka skul hi baroh kawei bad katei ka samla ka la pynpaw ka jingsngewkmen kaba khraw hadien ka jingïoh kheit ïa u soh ka jingjop.
Katei ka samla ka la ong ba ka jingthmu jong ka, ka long ban leit ïa ka Bachelor of Computer Applications (BCA) bad hadien kata kan sa peit ïa kaba hadien bad katei ka samla ka la ai mynsiem ïa kiwei ruh ki para samla ba kin leh bha bad ba kin khrehkot naduh kaba sdang ban poi sha ka thong.
Ka la ong ba haba ka ïoh por, ka ju khrehkot kumba 4 kynta eiei bad hashuwa ka ekamin pat, ka ju khrehkot kumba 5 ne 6 kynta eiei.
Katei ka samla ka la ai mynsiem ïa kiwei pat ki samla kiba thmu ban pynkhreh ïa ka eksam ba ki dei ban sngap bha ha klas namar kane ka jingïarap ïa ki bad ka la kitbok kitrwiang ïa kiwei pat ki samla pule ki ban pynkhreh ïa kane ka eksamin ba ki dei ban khrehkot lypa naduh kaba sdang ba kin ïoh ïa ka jingjop.
Haba ioh ban ïakren bad u kpa jong katei ka samla, u la ong ba kum ki kmie ki kpa ki sngewnguh ïa u Blei uba lah ban ïarap ïa ki khun ban pynshitom ïalade bad u la sngewnguh ba watla ka khun jong u ka khem leit ‘Tuition’ hynrei ka la lah ban poi sha katei ka thong.
Utei u rangbah u la ong ba kum ki kmie ki kpa ki dei ban long kum ki paralok bad ki khun jong ki namar kane kan ïarap shibun ban sngewthuh ïa ka jingmut, ka jingangnud bad ka jingthrang jong ki khun bad ym ban ñiom ïa ki da ka jingkwah jong ki kmie ki kpa hynrei dei ban sngap bad hun ïa kaei kaba ki khun ki kwah bad mon ban leh katkum ka jingsngewtynnad babha ka jong ki.
Na ka liang ka samla Riwaka Tangsong kaba la ïoh ha ka kyrdan kaba 10, ka la ong ba ka jingminot ka dei kaei kaba lah ban pynpoi sha ka thong bad ka la ong ba watla kam don kano-kano ka jingmutdur ba kan ïoh ïa katei ka kyrdan hynrei naduh ba la dangrit haduh ba kan da heh, ka ju don ïa ka mynsiem ban minot bad trei shitom ha ka kot.
Katei ka samla ka la ong ba ka kwah ban pyrshang ïa ka Civil Services Exam bad ka thong jong ka, ka long ba ka kwah ban long ophisar IAS.
“Ngam kwah ba ka jingtrei shitom jong nga kan long lehnohei bad nga wan na ka longïing longsem kaba shu biang, haba nga ïoh katkum kane ka lad nga kmen ba ka ïing ka sem jong nga ki ai ïanga ban kiew shaphrang ha ka jingnang jingstad jong nga,” la ong katei ka samla.
Na ka liang u Principal jong ka St. Edmund’s HSSu la ai khublei kyrpang ïa ki khynnah skul kiba la lah ban leh bha bad khamtam ïa ki nonghikai jong katei ka skul kiba la lah ban ai ka jinghikai kaba bha tam bad u la ong ba ka jingtrei shitom bad ka jinglen lade ka lah ban wanrah ïa u soh ka jingjop.
