Washington, Jymmang:
Ha kane ka khubor la ong ba ia utei u nong Arkansas, uba la shondur ialade ha ryngkat ka tawah kjat halor ka miej treikam jong ka Lamphang ka US- ka Nancy Pelosi ha ka jingleit thombor jong ki paidbah ha ka nongbah jong ka US ha u snem 2021, ha kane ka por pat la ong ba ka ïingbishar ka la pynjlan ia ka por shong patok jong u haduh 4 snem shiteng.
Ha utei u snem, la iohi lyngba ki dur ba la saphriang paidbah hapoh ki rynsan ‘Social Media’ ia u Richard Barnett, 63 snem ka rta, ha ka por ba u leit ban shong ha ka shuki treikam jong ka Nancy Pelosi bad u tawah kjat pat halor ka miej treikam jongka hi.
Katei ka dur ka long kawei na ki dur kaba la bna nam bha ha ka 6 tarik u Kyllalyngkot jong u snem 2021.
La ong ba u Barnett u la leit ban iasnoh kti lang bad ki nongïakhih kiba kyrshan ia u President barim ka United States- u Donald Trump ha katei ka por, ha kaba ki la leit ban thombor ia ki jaka treikam bad ki ophis treikam jong ki heh ka United States ha katei ka jingjia.
Ki la don ruh katto katne ngut ki heh kiba la kyntu ia ka ïingbishar ban pynngat ia u Barnett hapoh ki kyndon set patok kumba 7 snem.
La ong ba ha ka jingshisha, ym shym la iohi ia u Barnett ba un iadon kti ha ki kam thombor kumba kiwei ki la leh, hynrei kaba kham i-khlemakor ka long ba u la leit ban shondur hakhmat ka jaka treikam jong ka Pelosi ha ryngkat ka tawah kjat ban pyni ia ka jingbym burom shuh wat ia ki briew jong ka aiñ bad ia ki heh nongialam ka ri.
Katba, na ka liang ki nongïasaid aiñ jong u Barnett, ki la kyrpad ia ka ïingbishar ba kan pynshong patok ia u tang kumba 12 bnai lane shi snem tam.
Ki don palat 1,000 tam ki paidbah nongïakhih kiba la shah kem halor ka jingiadon kti jongki ha katei ka jingleit thombor ia ka jaka treikam katei ka Lamphang ha katei ka jingjia bad ka jingdawa jongki ka long ban pynneh ia u Trump hapoh ka White House wat hadien ba u la shah rem noh ha ka ilekshon kaba dang shu dep long shen ha katei ka por.
Kham bun na kitei kiba la shah kem, ki la shah pynngat hapoh ki kyndon pynkheiñ aiñ bapher kynthup ruh naduh ka jingpynjot bad jingpynjulor ia ki tiar- ki tar hynrei kumba 350 ngut pat ki la shah pynngat hapoh ki kyndon pynkheiñ aiñ namar ka jingdon kti ha ki kam thombor pyrshah ia ki heh ophisar. Katba 50 ngut pat ki dei kiba la shah pynngat ha ki kyndon kiba kham eh shuh shuh namar ki kam suhbuit bad ki kam sniew bapher kiba ki la iadon kti ha ki por ba la leit.
