Agartala, Jymmang:
Ka sorkar jong ka jylla Tripura ha kane ka taiew kaba mynta ka la bthah ïa ki nongtrei sorkar baroh ba ki dei ban long kiba tista ha ki kam ki jam ba ki trei ha ki tnat sorkar bapher bapher bad lada kim lah ban bud ïa katei ka jingbthah, ka sorkar kan shim da ki sienjam kiba tyngeh pyrshah ïa ki.
Kat kum ka jingpyllait kyrwoh jong u secretary ka General Administration Department jong ka sorkar jylla – Abhishek Singh u la pyntip ba na ka liang ka tnat sorkar ka la ïoh lum jingtip ba ki don bun ngut ki nongtrei sorkar kiba trei kam ha ki shlem trei kam jong ki tnat sorkar bapher bapher nalor ka jingpep trei bun sngi, kym ju bud ryntih bad tista ïa ki kynta trei kam bad poi slem ruh jan man ka sngi sha la ki jong ki jaka trei kam.
Halor katei, u la pynbna ba ka sorkar jylla ka bthah bad hukum ïa baroh ki nongtrei sorkar ba ki dei ban poi biang por sha ki jaka trei kam bad kumjuh ruh ba kin kiar na ka jingshim shuti kaba man la ka por.
Kat kum ka kyrwoh la bthah ruh ïa baroh ki nongtrei sorkar ba ki dei ban poi sha ki jaka trei kam shwa ka por, khnang ba ki riew paidbah kin lah ban ïoh ïa ki lad jingshakri naduh ka por 10 baje mynstep ha baroh ki sngi long trei.
La bthah ruh ïa baroh ki nongtrei sorkar ba kim dei ban mih na la ki jong ki kamra treikam hapdeng ka por 10:00 AM tad haduh ka por 5:30 PM ha ki sngi long trei, lait noh tang ha ki khep bad kim lah ban kiar bad ki dei ruh ban ïoh ïa ka jingai jingbit na ki bor kiba halor hashwa ban kin mih na ki jaka trei jong ki.
Na ka liang ka sorkar ka la pynmih ruh da ka hukum ba lada ki nongtrei sorkar kim shym la lah ban bud ïa katei ka jingbthah, ka tnat sorkar kan shim da ki sienjam kiba tyngeh ban pynshitom pyrshah ïa uno ne kano ka nongtrei kiba ïaleh pyrshah ïa ki hukum jong ka sorkar.
La bthah ruh ïa baroh ki ‘head’ jong ki tnat treikam sorkar bapher bapher ba ki dei ban bud ryntih bad pyntikna ïa ka jingpyntreikam ïa katei ka jingbthah jong ka sorkar.
