Chennai, Jymmang:
Uwei na ki khlur ialehkai Table Tennis ba pawkhmat bha ha ka ri (Ind) bad uba bat ruh ia ka kyrdan ba hajrong ha ka thup jong ki shynrang u Achanta Sharath Kamal (WR 51) bad u nongkhur takma Rnong na ka Asian Games u Sathiyan Gnanasekaran (WR56) ki long napdeng ki saw ngut ki nongialehkai ka ri kiba la shah pynneh biang ha la ka jong ka kynhun ialehkai sa na ka bynta ka aiom ialehkai ba 4 jong ka Ultimate Table Tennis (UTT).
Shuh shuh ruh ka khubor ka iathuh ba na katei ka lympung ialehkai, ka Chennai Lions kaba dang iai bat kum ka lahduh, mynta ka lah iai pynsah biang halade ia u Sharath Kamal. Katba ka kynhun kaba lah poi sha ka phainal ha ka aiom ialehkai ba 3 jong ka lympung ka Dabang Delhi TTC ka lah shim ia ka rai mynta ban iai iatreilang biang sa shisien bad u Sathiyan ha katei ka lympung ban long mynta u snem. Kumjuh ruh napdeng ki thei ialehkai ka ri, ka Manika Batra (WR39), mynta ka lah shah pynsah biang ha ka Bengaluru Smashers; katba ka nongkhur takma Rnong na ka Asian Games ka Manav Thakkar kan iai bteng biang ia ka kam shakri ka jong ka bad ka U Mumba TT.
Ka khubor ba lah ioh lum ka iathuh ba katei ka lympung ialehkai ka ban sa long kan sei madan ia ki hynriew tylli ki kynhun ialehkai; kata ka Bengaluru Smashers, Chennai Lions, Dabang Delhi TTC, Goa Challengers, Puneri Paltan Table Tennis bad U Mumba TT. Kumta ruh ha ka prokram ba dang shu dep ha kaba iadei bad ka jingpyniakab jong ki nongpyniaid ki kynhun na ka bynta katei ka lympung ban sa long, ki kynhun ki lah ban jied haduh 2 ngut ki nongpyniaid ia ka kynhun jong ki bad ka jingphaikhmat mynta ka long na ka bynta ban thaw ia ka kynhun ialehkai ba hynriew ngut ki nongialehkai ha katei ka aiom ialehkai ka ban wan lyngba ka prokram jingpyniakab ia ki nongialehkai ka ban sa long ha Mumbai ha u bnai ban wan.
