Guwahati, Jymmang:
Ki bor pulit jong ka jylla Assam ha ka 27 tarik mynta u bnai ki la pyntip ba uwei u samla pule ‘computer science’ jong ka NERIST – Aniket Dutta Gupta (19 snem ka rta) uba la jah rngai naduh ka sngi Balang ba la dep, u la donkti ban dkhat jubor ïa la ka jong ka jingim da kaba kynthih nalor ka jingkieng Bogibeel sha ka wah bah Brahmaputra.
Na ka liang ki bor pulit ki la pyntip ba ki la don ki briew kiba la ïohi ïa utei u samla ha ka por ba u la kynthih nalor katei ka jingkieng ha ka por kumba 7 baje mynstep.
Halor katei ka jingjia, la ïathuh ba na ka liang ki bor pulit ka jylla Assam lem bad ki briew jong ka NDRF ki la pynsdang ïa ka jingleit wad ïa utei u samla u ba la jah rngai.
Kat kum ka jingïathuh jong ki bor pulit ki la pyntip ba utei u samla hashwa ba un dkhat jubor ïa la ka jong ka jingim u la ïakren phone bad la ka jong ka kmie. Ki la pyntip shuh shuh ba utei u samla u la don hapdeng ka jingkhim jingmut kaba jur hadien ba ki nongap eksam ki la lap ba u donkti ha ka kam peit kot tuh. Kat kum ka jingïathuh jong ki bor pulit, ki la pyntip ba Aniket u dei u nongshong shnong ka thaiñ Tinsukia district.
