Shillong, Jymmang 28:
Ka Luton Town ka la lah ban pyndep ïa ka jingïaid lynti ka jong ka na ka lympung Non-League sha ka lympung English Premier League (EPL) hadien ba ka la lah ban pynliem noh ïa ka Coventry City ha ka play-off final jong ka lympung Championship kaba la long ha Wembley.
Ha kane ka jingïaleh-kai, ka Luton Town ka la ïoh ban thep ïa ka kol kaba nyngkong lyngba u Jordan Clark ha ka minit kaba 23 hynrei u Gustavo Hamer ka Coventry u la ïoh ban pynphai ïa kane ka shi kol ha ka minit kaba 66 bad haduh ba kut ka jingïalehkai, ha ka 90 minit ne wat hadien ka 120 minit ym shym la don kiba jop.
Kumta haba phai sha ka jingïashut tie-breaker, ka Luton Town ka la jop da 6-5 kol bad ban pynurlong ïa ka jingphoh sniew ban rung sha ka lympung English Premier League.
Ka sien ba khatduh ba ka Luton Town ka la don ha kane ka lympung ka la dei ha u snem 1992, kumta ka la hap ban ap haduh 31 snem ban shim biang ka jaka ha kane ka lympung kaba heh tam ha Ri England.
Ka Luton ka la kylla long ka kynhun ne ka club kaba nyngkong ba kan hiar na ka Premier League sha ka Non-League bad ban kiew biang sha ka Premier League, kaba la long shisha ka jinglah ka ban sah jingkynmaw khamtam na ka bynta u Rob Edwards, manager ka Luton.
Tang hadien shi snem, na kaba u la ïalam lynti ïa ka Forest Green sha ka nam lahduh jong ka League Two, u Edwards u la jop biang ïa ka jingkiew kyrdan kaba ar.
U la mih na ka Forest Green ban leit shimti ïa ka kam ha Watford ha kaba kut jong ka aiom kaba la lah, hynrei u la shah sloit noh ka kam ha u bnai Nailur.
U la wan phai biang sha ka kam ha u bnai Naiwieng hadien ba u Nathan Jones u la mih noh na ka Luton, bad mynta u Edwards u la lah ban wanrah pat ïa kata ka jingïaid lynti kaba khraw ha ka Luton.
