Shillong, Jymmang 28:
Ka long shisha ka khubor kaba pynkyndit ïa ki paidbah ka jylla bad ïa ka Sohïong konstitwensi namar tang hadien khatsaw sngi ba ki la pyrta ha ka Bom hadien ba u kyrtong ka UDP, Bah Synshar Lyngdoh u la ïoh jingjop ha ka ilekshon na Sohïong ha ka 13 tarik Jymmang 2023. Hynrei, ha ka 27 tarik Jymmang pat ki paidbah hapoh ka jingïalam u Bah Amazing Kurbah uba dei u nongïalap ilekshon uba tbit bha na ka UDP u la leit ban rah ‘placard’ hakhmat ka ïing sah u Bah Synshar ha Sohïong.
U Bah Amazing ryngkat ki ’riew paidbah naduh ki longkmie ki longkpa ki la leit rah ‘placard’ ha phyllaw ïing u Bah Synshar Lyngdoh ha ka 27 tarik Jymmang 2023 naduh ka por 12 baje shiteng sngi haduh 2 baje noh phai sngi.
Ha kane ka sngi la ïohi ba ki paidbah ki la wanrah da ki tiar pynsawa ban pyrta ïa u Bah Synshar ba un kren eiei ïa kane ka bhah thung kam kumba u la kren ha ka por ïalap ilekshon, khnang ban ai jingkyrshan ïa ka jingshah thngan u Bah Ardent Basaïawmoit hakhmat Additional Secretariat.
Haba ïakren bad u Bah Amazing u la ong balei u Bah Synshar u don dohnud maw haba haduh mynta um pat kren eiei wat hadien ba u la kren bha halor kane ka mat ha ka por ïalap ilekshon.
Nangta, u Bah Amazing u la ong ba haduh mynta u dang dei u nongkyrshan ka UDP haduh ban da kut ka samoi treikam u MLA, hynrei lada ki kyntait noh tang namar ba ki dawa ïa kane ka bhah thung kam thung jam ïa kata um lah ban leh eiei.
Nalor kata, u la ong ba ka jingwan ban rah ‘placard’ ha phyllaw ïing sah u MLA ka long namar ha ka por ilekshon ma u ryngkat bad u MLA ki la dep kren ïa kane ka jingdawa ban pynbun ka bhah thung kam sha ki Khasi.
Ha kajuh ka por u la ong lada ka UDP ne u MLA um kheiñ briew shuh hadien ba u la wanrah ‘placard’ um sngew eiei namar u la dep pynjop ïa u Bah Synshar naduh ba u la dep kular ban kyrshan ïa u Bah HDR Lyngdoh.
Kum ban shu pynkynmaw ki paidbah ka Sohïong konstitwensi bad ki paidbah ka jylla ki la ieid ïa u Bah Amazing haba ki sngap ha ‘youtube’ namar ka jingnang ban pynphai nia ïa ka jingkren ki nongïalam ka NPP ha ka por ilekshon.
