Khliehriat, Jymmang 28:
Ka long ka jingjia ka bym pat ju jia koit ba ha ka jaka sumar Sorkar, ki ’riew paidbah ki hap shim ïa ka bynta ne ka kam jong ki nos bad ki doktor kiba la pyntbit ïalade ban sumar ïa ki nongpang.
Kane ka jingjia ka la jia ha kawei ka jaka sumar Sorkar – ka Lumshnong PHC kaba hap hapoh Sutnga-Saipung konstitwensi bad Lumshnong C&RD Block, East Jaiñtia Hills ha kaba kawei ka longkmie kaba ap aspatal ka la shim ïa ka bynta jong ki nos bad doktor ban pynkha hi ïa i khyllung jong kawei ka longkmie armet kaba na Chiehruphi.
Kat kum ka jingïathuh ka Khasi Students’ Union (KSU), katei ka jingjia ka la jia ha ka 21 tarik u Jymmang.
U President ka KSU-Lumshnong, u samla Olenbat Pdang, u la kynnoh ba katei ka jingjia ka la jia namar ka jingbym larkam ki nos ki doktor jong ka Lumshnong PHC ban pyndep la ka kamram bad ka jingshakri ba la bynshet ha ki.
U la ong ba katei ka longkmie na Chiehruphi ka la wan ha katei ka jaka sumar ban kha khun ha ka miet 21 tarik ha ka por kumba 10 baje eiei.
U samla Pdang u ong ruh ba hadien ba ki nos ki la dep peit, ki la ïathuh ba ka por ban kha kan dei 2 baje mynstep bad hadien katei, ki la leit thiah noh sha jaka ba ki sah.
“Ha ka por 12 baje shiteng synñia, katei ka longkmie ka la suh khun bad ki bahaïing kiba ïadonlang ki la ‘phone’ sha ki nos ban phah wan kloi, hynrei kitei ki nos kim treh ban wan bad ki shu batai ha ka ‘phone’ ban leh kumne-kumtai bad ai da ka um ban dih,” u la kynnoh.
Jia ryngkhat ba la ap miet lang ïa katei ka longkmie da iwei i ’riew tymmen ba ju donsap ban pynkha khun bad iba dei i bahaïing ha sem bad kumta im banse ban pynkha hi namar bym lah ap shuh kat ban da wan poi kitei ki nos, la ong u Olenbat.
U la ong ba ynda la dap 2 baje thik, kitei ki nos ki la poi bad lap ba la dep ban pynkha.
“Hangta, kitei ki nos ki la ong, ‘O la dep pynkha mo’, bad ki leit phai biang sha jaka sah ban thiah bad ym ha kamra jong ki nos ha aspatal,” u la ong.
Kumta na ka liang ka KSU ka pynpaw ïa ka jingsngew lyngngoh halor kane ka jingbym pyndep hok ki nos ïa la ka kamram bad kane ka jingkheiñ sting ka lah ban wanrah ïa ka jingjia ba sngewsih lada jia bym don itei meirad iba tip ban pynkha khun.
Ka KSU ka la ong ruh ba kane ka jaka sumar ka don uwei u doktor bad ha kane ka sngi ba jia, um shym la don ha PHC.
Une u doktor ruh u la dei ban leit pyntbit ïalade, hynrei namar ba ka Sorkar kam thung, u la hap ban neh ban ai jingshakri ha kane ka jaka sumar.
