Bongaigaon, Jymmang:
Hadien ki jingïoh ïa ki jingtip kiba bniah, ka kynhun Crime Intelligence Branch (CIB) jong ka tnat pahara Railway Protection Force (RPF), ha ryngkat ka jingïatreilang bad ki bor pahara ka New Bongaigaon GRP ki la leit ban pynlong ïa ki jingkhynra ha kawei ka rel bad ïoh ruh ban kurup ïa 2 tylli ki pistpl. Ïa katei ka jingleit khynra la leit ban pynlong ha ka sngi Balang ba la dep bad ïa ki pistol la lap na kawei ka pla kaba don ha ka jaka shong kaba 67 jong ka rel Coach No S5 jong ka 15657 Up Brahmaputra Mail.
Na ka liang ka kynhun CIB hapoh ka jingïalam jong u SI Digambar Deka ki la ïoh ban kurup ïa kitei ki 2 tylli ki pistol ha ryngkat 10 tylli ki kuli. Halor katei ka jingjia, la ïathuh ba na ka liang ki bor pahara ki la ïoh ruh ban kem ïa ki 2 ngut ki briew ïa kiba la suba jur ba ki dei ki trai jong ka pla ba la thep ïa ki pistol; hynrei tad haduh ba la ïoh lum ïa kane ka khubor ym pat shym la lah satia ban pyntikna la kitei ki briew ki dei shisha ne em ki trai.
