Shillong, Jymmang 28:
Ka Bayern Munich ka la jop bad rah ïa ka nam lahduh kaba 11 sien kynthih jong ka lympung Bundesliga hadien ba ka la lah ban pynliem noh ïa ka Cologne ha ka jingïalehkai kaba khatduh jong kane lympung.
Kane ka jingïoh rah ka Bayern Munich ïa ka nam lahduh ka la long hadien ba ka Borussia Dortmund ka la mad noh ka jingïakhaid. Ha ka jingshisha ka Borussia Dortmund ka la don ha ka lynti ban rah ïa ka nam lahduh kaba nyngkong kata naduh u snem 2011-12, lada dei ba ka la lah ban pynliem noh ïa ka Mainz, hynrei ka jingïakhaid da mar 2 kol, ka la plie ka jingkhang na ka bynta ka Bayern.
Haba phai sha ka jingïalehkai, tang ha ka minit kaba 8, ka Bayern Munich lyngba u Kingsley Coman ka la khyrwit ïa ka kol kaba nyngkong hynrei dei tad ha ka minit kaba 81 ba ka Cologne lyngba u Dejan Ljubicic ka la ïoh ban pynphai ïa ka shi kol bad la i kumba ka Munich kan hap ban hun noh ïa ka kyrdan kaba ar, hynrei ha ka minit kaba 89 u Jamal Musiala u la pynkhih hi win ïa ki nongkyrshan, hadien ba u la ïoh ban khyrwit ïa ka kol kaba ar.
Kumba ka long mynta, ka jingïoh rah ka Bayern Munich ïa ka nam lahduh na ka Dortmund ka la long tang na ka jingïapher ha ka jingthep kol namar baroh ar liang ki la ïoh mar 71 point.
