Shillong, Jymmang 28:
Ka Umphyrnai Sports Club ka la ïoh rah ïa ka nam kum ka lahduh jong ka lympung SSA Under-10 (Boys) Football League 2023, hadien ba ka la lah ban pynliem noh ïa ka Sohryngkham Sports Club ha ka final kaba la long ha ka sngi Saitjaiñ.
Haba phai sha ka jingïalehkai final kaba la pynlong ha madan Lawmali kaba don mar pyrshah bad ka Regional Blood Centre Pasteur Hills, Shillong, ka Umphyrnai SC ka la lah ban pynliem noh ïa ka Sohryngkham SC da 4-1 kol.
Ïa ki kol jong ka Umphyrnai la ïoh ban khyrwit da u Bankyrshanbor Khar-kongor ha ka minit kaba 8 bad 11, u Wanmebantei Kharkongor ha ka minit kaba 21 bad u Dibormy Kharkongor ha ka minit kaba 23. Katba ïa ka shi kol jong ka Sohryngkham pat la ïoh ban thep da u Namebantei Kharbuli ha ka minit kaba 9.
Kane kan dei ka lympung ïalehkai phutbol kaba nyngkong jong ka SSA ka ban long ha u snem 2023. Kane ka lympung ka la sdang ha u bnai Lber ïa kaba la pynlong ha ka madan Second Ground hynrei la hap ban pynkynriah noh sha ka madan ha Lawmali namar ka jingbym lait jong kane ka madan ha Polo.
Ha kane ka lympung ki la don haduh khat-hynñiew tylli ki kynhun kiba la wan ban ïashim bynta kiba la phiah ha ki saw tylli ki group. Katba ar tylli ki kynhun ba wan hakhmat na ki group kin ïoh rung sha ka quarter-final.
Ka Umphyrnai kaba la rah ïa ka nam lahduh jong kane ka lympung, ka la ïoh ban khung ïa ka song pisa kaba long T.10 hajar ryngkat ka trophy nalor ki medal katba ka Sohryngkham ka la ïoh T.6 hajar bad ka trophy nalor ki medal.
Ha kane ka sngi la ïadon lang ruh kiba bun ki dkhot ba rangbah jong ka SSA ba kynthup ïa u Bah Karsing Kurbah, Bah Robert Dkhar, Bah SS Rapthap bad Bah Prosper Warjri, nalor kiwei pat.
