Shillong, Jymmang 28:
U MLA ka Nongkrem bad uba dei ruh u President ka Voice of the People Party (VPP), Bah Ardent Basaïawmoit, u la ong ba kam don jingmut ïa ka sorkar ba kan thung dkhot ïa u ha ka committee ban peit bniah ïa ka Roster System namar naduh kaba sdang ka seng ka la kren shai ba kim treh ban ïakren, hynrei ka dawa ban pynkylla thymmai ïa ka bhah thung kam thung jam.
Haba ai jingkren sha ki paidbah kiba wan ai mynsiem ïa u hakhmat ka Additional Secretariat kaba la long mynta ka Sngi U Blei ha ka por janmiet, u Bah Ardent u la ong ba kam don jingmut ïa ka sorkar ban thung dkhot ha ka Committee ban peit bniah biang ïa ka Roster System namar ma u naduh dang sdang um kwah ban ïakren ïa ka Roster, hynrei u la dawa beit ban pynthymmai ïa ka bhah thung kam (Reservation Policy) kaba la ïaid mynta la palat sanphew snem.
Nangta, u la ong ba kane ka jingleh ka sorkar ka long tang ban pynthame ban pyni ba um treh ban ïakren haba la thung dkhot, hynrei kumba u la dawa naduh ba sdang ka sorkar ka dei ban pynthymmai beit namar lada ym lah mynta kane kan buh jingeh da ki phew snem ba ki samla kin ïoh kam.
Ha kajuh ka por u la pynbna ba ha kane ka jaka shah thngan la weng noh ïa ka lama VPP bad la wah noh da ka lama lai rong ban pyni ïa ka jingïatylli kum kawei ka jaitbynriew.
“Ngim kwah ba ka seng kan shim ïa ka burom, hynrei ka burom ka dei jong ka jaitbynriew namar ngam ngeit ba don kiba ong ba u Khasi um ju ïatylli bad mynta ngin ïatylli noh tang kawei ka jaitbynriew, kata khynriam u Pnar, u Bhoi u War, u Maram u Lyngngam u dei u paid Khasi ba ïar” u la ong.
Nalor kata, u la ong ka jingwan ki paidbah na kylleng ki jaka ka pyni ba ki ieid shisha ïa kane ka jingdonkam jong ka jaitbynriew, bad namar kata lada kiba kwah burom kin ieh sharud, ka VPP kan dei tang ka nongïalam.
“Ngin pyni ïa ka jingïatylli sha ka pyrthei ba kum ka jaitbynriew ngin jop ha ka jingïaleh tad haduh ban da pynbeit thymmai ïa ka bhah thung kam” u la ong.
Shuh shuh u la pynshai ruh sha ki paidbah ba kim dei ban sngew lyngngoh ba haduh hynriew sngi u lah ban shah thngan, hynrei kane baroh ka dei ka jingieid jong U Blei namar u don ka jingkyrmen ba kane ka jingïakhun kan seisoh beit.
Kum ban shu pynkynmaw, u Bah Ardent Basaïawmoit u la sdang shah thngan naduh ka 23 tarik Jymmang, 2023 hakhmat Secretariat bad hadien kata la kynriah noh ha ka por mynmiet sha Additional Secretariat ban suk ka leit ka wan ki paidbah bad ban lait na ka jingpynthut u slap.
