Shillong, Jymmang 28:
U Donlad Diengdoh u la ïoh ban khyrwit ïa ka hat-trick ba ar ha ka lympung Meghalaya State League 2023 bad pynlong ïa ka Mawlai Sports Club ban jop da 7-0 kol ïa ka Umrit Sports Club ha ka jingïalehkai jong ka Group A kaba la long ha ka sngi Saitjaiñ ha madan MFA Turf ha Shillong.
Haba phai sha kiwei ki risol jong kane ka lympung, ka Mulait United ka la pynliem ïa ka Sein Pyn-bhalang da 5-1 kol ha ka Group B kaba la long ha Kiang Nangbah Stadium ha Jowai. Katba ka Shillong Lajong ka la pynliem ïa ka Pyndengrei Sports Club da 3-0 kol ha ka Group C. Ha ka jingïalehkai jong ka Group-D pat, ka Selsella Sports Association ka la ïakhaid noh da mar ar kol ha ka jingïakhun pyrshah ïa ka Chipakkore.
Haba phai sha ka jingïalehkai, ka Mawlai ka la ïoh ka jingsdang kaba paka bha ha kane ka aiom kaba nyngkong jong ka MSL, ha kaba ka la jop baroh saw tylli ki jing-ïalehkai bad khur 12 point bad don hakhliehduh ha ka Group A.
Ha ka jingïakhun pyrshah ïa ka Umrit, tang ha ka kylla step ka Mawlai lyngba u Donlad Dieng-doh u la ïoh ban khyrwit haduh saw tylli ki kol, kita ha ka minit kaba 3, 9, 29 bad 45’+1 bad ruh ka kol na u Kenstar Kharshong ha ka minit ba 11 bad u Robert Khongriah ha ka minit kaba 21 ka la pynlong lypa ban tam da 6-0 kol.
Hynrei watla ha ka kylla miet, ka Mawlai kaba la dei ban ïoh bun tylli ki kol, ka la lah ban pynkhih sa tang shi kol, ha ka minit kaba 57 ba la thep da u Donborlang Nongkynrih.
Kane kan dei ka sien ba nyngkong ba ka Mawlai, kaba la lah ban pynpaw ka jingtbit ha kane ka lympung, ka la lah ban ïada ïa la ka kol, khlem da ailad ïa ki liang ba ïakhun pyrshah ban ïoh thep wat tang shi kol ruh, watla ha diengkol kam shym la ïoh ban pynïaleh-kai ïa u nongap kol ba tbit jong ka, u Neithovilie Chalieu uba la shah pynduh namar ka jingïoh red card ha ka jingïalehkai kaba la dep.
Haba phai pat sha ka jingïalehkai ba la long ha madan MDSA ha Maw-kyrwat, ka Shillong Lajong kaba dei ka lahduh jong ka aiom ba la lah, ka la jop da 3-0 kol ïa ka Pyndengrei bad ïa kine ki kol la thep da u Shano Tariang ha ka minit ba 12 bad 57 bad u Sambor Kharsahnoh ha ka minit ba 89.
Lyngba kane ka jing-jop, ka Shillong Lajong ka la kiew sha ka kyrdan kaba ar ha ka Group C na ki 6 point katba ka kyrdan ba nyngkong dang bat da ka Seven United kaba la ïoh 8 point, hynrei kumba long mynta ka Shillong Lajong, ka dang don sa ar tylli ki jingïakhun.
Haba phai sha ka jingïalehkai ha Jowai, ka jingleh bakla jong u nongap kol ka Sein Pynbha-lang u Leiborki Ymbon ha ka minit ba 41 ka la pynïoh ïa ka Mulait ïa ka kol kaba nyngkong. U Leiborki u la ïaleh ban thap ïa kol shabar hynrei ka la rung pynban jlang shapoh ka kol bad ïa kane ka kol la ai sha u Lamphrang Paslein uba la shut ïa ka bol.
Tang ha ka minit ba 43, ka Mulait ka la ïoh sa ka kol ba ar, ïa kaba la khyrwit da u Lency Swer bad ha ka minit ba 66, u Lency u la khyrwit ïa ka kol ba lai jong ka Mulait bad ba ar ka jong u. Kiwei pat kiba la khyrwit kol ki long u Romarius Laban ha ka minit ba 76 bad u Rimonki Lamurong ha ka minit ba 90’+5, katba ka Sein Pynbhalang ka la ïoh ban pynphai tang shi kol, ïa kaba la thep ha ka minit kaba 87 da u Tympang Tangliang.
Ha ka jingïalehkai ha madan Chandmari ha Tura, ha kaba sdang la i kumba ka Selsella kan khur ïa ki 3 point kata hadien ba ka la lah ban tam da 2 kol bad ïa kine ki kol la thep da u Sildish Momin ha ka minit kaba 28 bad u Sillingston Sangma ha ka minit kaba 75.
Hynrei dei ha ka minit kaba 80 ba ka Chipakkore ka la ïoh ban pynphai ïa ka kol kaba nyngkong lyngba u Johnfield A Sangma bad ha shwa ban wai ka jingïa-lehkai, ha ka minit kaba 90 la ïoh ban pynïakhaid lyngba ka kol kaba la dep da u Harlee K Marak.
Watla ka Selsella ka la bteng ban nym pat mad ka nam rem ha ka MSL 2023 hynrei kane kan dei ruh ka jingïakhaid kaba lai na ki saw tylli ki jingïalehkai bad kumta ka don ha ka kyrdan kaba lai ha ka Group-D na ki 6 point, kata hadien jong ka Khliehmawlieh bad Wasa FC kiba la kamai mar 7 point katba ka Chipak-kore ka don ha ka kyrdan ba saw na ki 5 point.
Ki jingïalehkai ban long ha ka sngi Nyngkong ka 29 tarik, ha ka Group A ha Shillong, ka Langsning kan ïakhun pyrshah ïa ka Seng Samla Laitryngew ha ka por 3 baje janmiet. Ha ka Group B ha Jowai, ka Ladthalaboh pyrshah ïa ka Niaw Wasa United ha ka por 2:30 mynsngi, ha ka Group C ha Maw-kyrwat ka Lumdiengngan pyrshah ïa ka Riangdo ha ka por 3 baje janmiet bad ha ka Group D ha Tura ka Khliehmawlieh pyrshah ïa ka Wa’sa FC ha ka por 3 baje janmiet.
