Khyrwit kol u Messi, rah ka PSG ïa ka nam lahduh ka Ligue 1 ha France

Shillong, Jymmang 28:  

Ka shi kol kaba la ïoh ban khyrwit da u Lionel Messi ka la pynlong ïa ka Paris St-Germain (PSG) ban ïoh rah ïa ka nam lahduh kaba 11 sien jong ka lympung Ligue 1 ha France.

Ha ka jingïakhun, watla ka PSG ka la ïakhaid noh da mar shi kol bad ka Strasbourg hynrei ka la biang pura ban khur ïa ka nam lahduh. Ïa ka kol ka PSG, u Messi u la ïoh ban thep ha ka minit kaba 59 hynrei ka Strasbourg lyngba u Kevin Gameiro ka la ïoh ban pynïakhaid ha ka minit kaba 79.

Katei ka shi kol ba la ïoh khyrwit da u Lionel Messi kan dei ruh kaba 496 tylli ha ka dewbah Europe bad kaba la lah ban pyntam ruh ïa ka jingthep kol da u Cristiano Ronaldo uba la thep 495 tylli.

Kane ka kol kan dei ruh kaba 32 tylli na ka bynta ka PSG bad ruh kaba lah ban dei ka kol kaba khatduh jong u Lionel Messi, naba la khmih lynti ba u lah ban mih noh ha kane ka aiom ba mynta.

Mar ïa put u referee ban pynwai, ka jingleh kmen ka la wan ym tang ha ki rangïalehkai hynrei wat ha ki nongkyrshan namar ki la tip lypa ba ka shi point ka la biang pura ban rah ïa ka nam lahduh.

Ka lawei jong u Christophe Galtier ruh ka don ha ka jingartatien watla u la lah ban ïarap ïa ka PSG ban jop ïa ka khusnam lahduh.

U Christophe u la shimti ïa ka PSG ha kaba sdang jong ka aiom, kata hadien ba u la lam lynti ïa ka Lille sha ka nam lahduh ha u 2020-21, hynrei ka jingshah rem noh ha ka lympung Champions League ha ka Bayern Munich, ka la buh jingeh bad jingartatien ba un dang bteng ïa ka kam.

Ka PSG mynta ka la lah ban tam ïa ka Saint-Etienne bad Marseille kiba la khur mar 10 tylli ki nam lahduh ka Ligue-1.