England, Jymmang:
Uwei na ki rangialehkai Tennis ka ri Bilat u Andy Murray u pynbna paidbah ia ka jingweng noh ban shimbynta ha ka lympung iakhun Grand Slam ka ban sa long mynta u snem ha Roland Garros ka French Open na ka daw ka jingkwah pynleit jingmut ha ka aiom ialehkai ia ki jing-ialehkai ha madan-phlang kum ka jingiai kyntiew shuh shuh ka rukom ialehkai ka jong u shaduh ka Wimbledon.
Nangta, ka khubor ka iathuh ruh ba u Andy u lah kynran-dien noh mynta na ka rynsan jied nong-ialehkai jong katei ka lympung hadien ba u lah mad ia ka jingeh na ka bynta ka jingpynwandur biang ka rukom ialehkai ba tbit ka jong u ha ka lympung ialehkai ha madan khyndew dang ha ki taiew ba lah dep, bad ha ka jaka ba un shimbynta ha katei ka lympung, un pynleit jingmut khambun ha ki prokram ialehkai ha madan-phlang ha ka jingiaid lynti ka jong u sha ka Wimbledon. U Andy u lah iakhun ruh na ka bynta ban pynthymmai biang halade ia ka kam ialehkai ka jong u hadien ba u lah dep ban shah puid ka met jong u ha u snem 2018. Kumta kum u rangialehkai ba tbit, u Murray u lah pynliem ruh ia u Tommy Paul ha ka jingiakhun phainal jong ka ATP Challenger tournament ha kaba sdang jong une u bnai ba mynta na ka bynta ban khur shalade ia ka jingjop ba nyngkong ha kino ma ki kyrdan ialehkai naduh u snem 2019, hynrei uba lah mad pat ia ka jingshah weng noh tang ha ka kylla iakhun kaba nyngkong ha ki ar lympung ialehkai kata ha Monte Carlo & Madrid Open.
Haduh mynta u Andy u dang iai rai ha kano ka lympung ialehkai ba un shimbynt ka ba lah ruh ban kynthup ia ka Surbiton naduh ka 4-11 tarik u Jylliew bad ka Queen’s naduh ka 19-25 tarik u Jylliew ha shuwa ba ka lympung ialehkai ka Wimbledon kan sdang naduh ka 3 tarik u Naitung.
