Agartala, Jymmang:
Ki nongïalam jong ka TIPRA Motha ha ki khyndiat sngi kiba la leit noh ki la kyrpad na u Lat ka jylla ba un shimkhia halor ki sienjam kiba dei na ka bynta ka bha ka miat jong ki paidbah nongshong shnong trai muluk jong ka jylla bad kumjuh ruh na ka bynta ban pynjlih bad pynjanai ïa ki rukom trei kam jong ka Tripura Tribal Areas Autonomous District Council.
Halor katei ka mat, la ïathuh ba na ka liang ki nongïalam ka TIPRA Motha ki la leit ban aiti ruh da ka dorkhas sha u Lat jong ka jylla – Satyadeo Narain Arya ban pyntip ïa u halor ki jingeh kiba ki paidbah nongshong shnong trai muluk ki ïakynduh bad kumjuh ruh halor ki sienjam kiba ïadei bad ka jingpynjlih ïa ki rukom trei kam jong ka Tripura Tribal Areas Autonomous District Council (TTAADC).
Kat kum ki jingïoh lum jingtip la ïathuh ba ki nongïalam jong ka TIPRA Motha hapoh ka jingïalam jong u Pradyot Debbarma ki la leit ruh ban pynlong da ka jingïashong kyllaiñ mungor habar ka Raj Bhawan kaba don ha ka nongbah Agartala kum ka dak ban pyrshah ïa ka jingbymshimkhia jong ka shlem treikam u Lat halor ki katto katne tylli ki mat ba ka seng ka don ban dawa.
Ha ka dorkhas, na ka liang ki MLA, MDC bad EM jong ka TIPRA Motha ki la pyntip ba ki nongshong shnong trai muluk jong ka jylla ki la shah synshar sobor bad shah ñion beiñ la kum ki nongshong shnong ki bym dei satia ki trai muluk jong ka jylla.
Ha ka dorkhas na ka liang ki nongïalam ka TIPRA Motha ki la pyntip ruh ba ki nongshong shnong trai muluk jong ka jylla ki don ïa ka hok ban ïoh lad im suk im saiñ, hynrei na ka daw jong ka jingbym shimkhia jong ka sorkar jylla ka la wanrah ïa ki jingïatynjuh kiba har rukom hapdeng ki nongshong shnong.
Ki la kynnoh ruh ba ka TTADC ka la shah leh meinah ha ka sorkar Tripura ha kaba ha ki 2 snem kiba la leit noh ki la don bun tylli ki ‘bill’ kiba donkam kiba la pyllait da ka TTADC hynrei kiba dang sah kut tad haduh kane ka kynti kaba mynta ha ka shlem trei kam jong u Lat.
Ki nongïalam ka TIPRA Motha ki la pyntip shuh shuh ba na ka T.619.25 klur ka pisa ba la mang kyrpang na ka bynta ka TTADC ha u snem mang tyngka 2022-23, ka Sorkar Tripura kam pat shym la lah satia ban pyllait ïa T.126.59 klur kaba sah. Ki la pyntip ba na katei ka daw, ka la wanrah ïa ka jingeh kaba khraw ha ka liang ki kam ban sam tulop sha ki nongtrei ka TTADC bad wanrah ruh ïa ki jingeh na ka bynta ban pyntrei ïa kino kino ki kam pynroi ha ka thaiñ.
Na ka liang ki nongïalam ka TIPRA Motha ki la kynnoh ruh ba ïa ka ilekshon Village Council kaba la buh ban pynlong ha u bnai Lber, 2021 ym pat shym la lah ban pynlong watla na ka liang ka High Court jong ka jylla Tripura ka la pynmih ïa ki jingbthah. Ki la kynnoh ba katei ruh ka la wanrah ïa ki jingeh ha kaba ïadei bad ka jingpyntrei ïa ki kam pyntoi ha ki thaiñ kiba hap hapoh ka jingkhmih jong ka TTADC.
Ha ka dorkhas, na ka liang ki nongïalam jong ka TIPRA Motha ki la pyntip ba sha u Lat ka jylla ba u dei ban shimti ïa ki lad ki lynti ba donkam na ka bynta ka bha ka miat bad ka roi ka par jong ki paidbah nongshong shnong trai muluk jong ka jylla bad kumjuh ruh ba un bthah ïa ka sorkar jylla ba kan leh eiei halor ki jingeh kiba ka TTADC ka la ïakynduh. Na ka liang ki nongïalam ka TIPRA Motha ki la pyntip ruh ba lada ka sorkar jylla kam shym la lah ban leh eiei halor katei ka mat wat hadien ka jingïoh ïa ki jingbthah na u Lat ka jylla, ka seng kan nym phai dien ban pynlong da ka jingïakhih paidbah kaba jur ha ka jylla.
