Pune, Jymmang:
Ki 12 ngut ki dkhot jong kawei ka kynhun na ka kompani MotoGP ka Dorna Sports, ka lah pyndep mynta ia ka jing-leit ban jurip ia ka Buddh International Circuit kaba don ha ri India ha shuwa ban plie pyrda ia kaba sdang jong ka lympung pynmareh thuk-thuk ka ban sa long naduh ka 22-24 tarik u Nailur mynta u snem.
Kumta katei ka kynhun ia kaba lah lamkhmat da ka director jong ka Dorna na ka bynta ki rynsan ialehkai ka Norma Luna, ka lah pynlong ia ka jingleit jurip na ka bynta ban weng noh ia ki katto katne ki jingeh kiba katei ka madan ka iakynduh bad ka jingleit ruh ban jurip ia ka jaka ha ka ban pyllait paidbah ia ki jing-ialehkai bad ki jingdonkam baroh kiba donkam na ka bynta ka lympung khnang ban lah ha ka ban wanrah ia ka lympung kaba jop bad seisoh.
Shuh shuh ruh na ka liang jong u Puskar Nath u COO ka FairStreet Sports uba long u nongkyntiew ia ka lympung ialehkai ha ka ri India baroh kawei u lah thikna shibun ba ka madan ialehkai ha India kan lah ha ka ban kyntiew mynta ia ka tei ka lympung ialehkai ka ban sa long.
Ka bynta kaba khraw tam ha ka ban pynlong ia ka MotoGP ka long ruh shi bynta jong ka jingpyni paidbah ia ka jingnang iai kiew shuh shuh ki kam jngohkai ha ka ri bad katei ka jingleit ban jurip da katei ka kynhun jong ka Dorna, ka lah ioh ruh ka lad ha ka ban leit jngoh ia kawei na ki jingthaw ba lah rim tam bad ka jingsngew Sarong jong ka ri baroh kawei halor ka jingdon jong ka Taj Mahal ha Uttar Pradesh.
Na ka liang jong kitei ki nongpyniaid ki pynpaw ruh ia ka jing-kmen ha kaba iadei bad ka jinglong jingman jong katei ka madan ialehkai kaba da shisha ka long ka madan kaba biang eh na ka bynta ban ai ia kata ka hok ban pynlong ia ka lympung pynmareh thuk-thuk ka ban sa long mynta u snem.
