Shillong, Jymmang 28:
Ka Hynñiewtrep Integrated Territorial Organisation (HITO) ha ka Sngi U Blei ka la tar ïa ka shithi ba la phah da ka Sorkar ban wer ïa ka seng sha ka jingïalang halor ka ‘Reservation Roster’ ka ban long ha ka 31 tarik mynta u bnai.
“Ngi kwah ban phah ka kyrwoh sha ka Sorkar ba kumba ki paidbah ki tip ba ka HITO ka ïeng skhem ban dawa khmih bniah ïa ka ‘Reservation Policy’, hynrei kaba sngewphylla pat, kane ka Sorkar dang mynnin ka phah ïa kane ka shithi sha ka ophis treikam ka seng,” la ong u President ka HITO, Bah Donbok Dkhar haba kren sha ki lad pathai khubor.
Haba pynshai ba ka shithi ba la phah da ka Sorkar ka long ban khot ïa ka seng ban ïakren halor ka ‘Reservation Roster’, u la ong ba ka seng ka kyntait ïa katei ka jingkhot bad kan ym leit ïashim bynta sha katei ka jingïalang namarba ka seng ka ïeng skhem ha ka nongrim…kata ban dawa khmih bniah ïa ka ‘Reservation Policy’.
“Wat nym pynbiej ïa ngi ki khun samla, namarba ki paid ka Bri u Hynñiewtrep ki mynjur ban khmih bniah ïa ka ‘Reservation Policy’,” la ong u Bah Dkhar.
Halor ka jingthung ïa ka Myntri Sorkar, Dr. M. Ampareen Lyngdoh ban khlieh ïa ka komiti na bynta ka jingpyntreikam ïa ka ‘Reservation Roster’, utei u nongïalam u la kdew ba ka Dr. Lyngdoh ka la kren teng ïa ka ‘Reservation Policy’ ha u 2018 bad ha u snem ba la dep ha shuwa ka ilekshon.
Ha kajuh ka por, ka seng ka la ong ba u Bah H.M. Shangpliang uba long u dkhot jong katei ka komiti u la kren ba dei ban khmih bniah bad pynbeit ïa ka ‘Reservation Policy’.
“Haba kito hi ki shong hangto, hato ngi dang shaniah ïa kum kito ki jait briew, hato ngin shaniah ïa kane ka Sorkar. Kane ka long ka buit pynslem na ka liang ka Sorkar,” u la ong.
U la pynsngew ba lada ka Sorkar ka kwah shisha haduh katta-katta, ka dei ban khot ïa ka Voice of the People Party (VPP) ban ïakren ïa ka ‘Reservation Policy’.
“Phin khot ïa ngi ki sengbhalang, ngim dei ma ngi ban shna aiñ, dei ki nongmihkhmat kiba ngi la dep pynjop, dei kita. Phin khot leh aïu ïa ngi, phin shu pynsngew namar ngi tip shai ïa ka jingbuit tuh jong ka Sorkar MDA-II,” la ong u Bah Dkhar.
Haba pynkynmaw ïa ka jingkhot jong ka Sorkar halor ka soskular u pud u sam, u la ong ba ka Sorkar ka khlem khot ban ïakren hynrei ka shu pule ba ka la dep katta-katta.
“Ha kane ka kynti ruh ngi sngewthuh ba kane kan dei ka kaiphod ba phin ai ba hapoh 15 sngi ban pyntreikam ïa ka ‘Roster System’,” u la ong da kaba bynrap, “Phi lah ban pynbiej ïa ngi shisien hynrei ym bunsien, ngi kren da kaba shai.”
Shuh shuh u la ong ba na ka liang ka HITO, kan ym leit sha katei ka jingïalang bad kyntu ruh ïa baroh kiba shah khot sngewbha ba kim dei satia ban leit namar kan ym ïalam sha ka jingmanbha.
