Guwahati, Jymmang:
U Myntri ka tnat Panchayat & Rural Development (P&RD) jong ka jylla Assam, u Ranjeet Kumar Dass ha ki khyndiat sngi kiba la leit noh u la pyntip ba ka sorkar ka la lah ban tei ïa palat 18 lak tylli ki ïing hapoh ka skhim Pradhan Mantri Awas Yojana – Gramin (PMAY-G). U la pyntip ba tad haduh kane ka kynti ba mynta ka sorkar ka la lah ban pyndep ïa palat 11 lak tylli ki ïing.
Ha ka jingïalang bad ki lad pathai khubor ba la pynlong ha Guwahati, na ka liang u Dass u la ïathuh ba ki la don palat 19 lak ngut ki nongïoh myntoi kiba la shah kynthup ban ïoh ïa ki lad jingïarap na ka skhim PMAY-G. U Myntri u la pyntip ba naduh ka jingpynsdang treikam ïa katei ka skhim bad kumjuh ruh ïa ka jingpynsdang ïa ka prokram ‘Housing for All’, ka sorkar Assam ka la dep ban mang kyrpang na ka bynta ban tei ïa 18,30,400 tylli ki ïing PMAY-G. Na kitei baroh, ka sorkar ka la dep ban pyntei ïa 11,63,417 tylli ki ïing ha kaba 7,59,163 tylli la lah ban pyndep ha ki 2 snem kiba la dep.
U Myntri ka tnat Panchayat & Rural Development u la pyntip shuh shuh ba ïa ki ïing kiba dang sah yn sa lah noh ban pyndep hashwa ka 15 tarik u Nailar, 2023. U la pyntip shuh shuh ba naduh u snem mang tyngka 2022-2023 tad haduh kane ka kynti ba mynta, ka sorkar jylla ka la pynlut haduh T.12,504.79 klur na ka bynta ban pyntreikam ïa ka skhim PMAY-G. U la ïathuh ruh ba na ka liang ka sorkar jylla tad haduh kane ka kynti ba mynta ka la lah ban pynbiang ïa ki ïing sha ki 40,096 tylli ki longïing ki bym don ïing don sem ha ki por kiba la leit.
U Myntri u la pyntip shuh shuh ban pynbiang ïa ki ïing na ka bynta ki longïing ki bym don ïing don sem, ka sorkar ka la shim da ki sienjam ban pynbiang ïa ka jaka na ka bynta ban tei ïa ki ïing kiba hapoh ka skhim PMAY-G. U la pyntip ba tad haduh kane ka kynti ba mynta, ka sorkar ka la pyndep ïa 7 tylli ki ‘cluster’ bad 19 tylli kiwei pat ki ‘cluster’ ki dang don hapdeng ka jingpyntrei ha ki 10 tylli ki distrik jong ka jylla.
Na ka liang u Myntri u la pyntip shuh shuh ba ka sorkar jylla ka don ïa ka jingthmu ban pynlong da ka rynsan ‘griha pravesh’ ban rakhe ïa ka jinglah ban pyndep tei ïa palat 2.5 lak tylli ki ïing.
