Shillong, Jymmang 28:
Ka Benfica ka la ïoh rah ïa ka nam lahduh jong ka lympung Portuguese Primeira Liga ha ka sien kaba nyngkong eh, kata naduh u snem 2018-19 ba ka la rah khatduh, hadien ba ka la lah ban pynliem noh ïa ka Santa Clara da 3-0 kol ha ka jingïalehkai kaba khatduh jong kane ka lympung.
Ka Benfica haba ka hiar madan, ka la dep tip lypa, ba lada ka mad ïa ka nam rem, kan long kumba plie jingkhang ïa ka FC Porto hynrei ki lai tylli ki kol kiba la thep da u Goncalo Ramos, Rafa Silva bad u Alex Grimaldo ka la pynlong ïa ka Benfica, ba la ïalam da u Roger Schmidt ban rah syndon ïa ka nam lahduh.
Kane kan dei ruh ka nam lahduh kaba 38 sien na ka bynta ka Benfica ha kane ka lympung. Kumba ka long ha kane ka aiom kaba mynta, ka Benfica ka la pynkut ïa kane ka aiom tang da saw tylli kin am rem ha baroh ki lympung, ha kaba ki lai tylli ki nam rem ki la wan tang hapoh ki khyndai sngi, kata ha u bnai Ïaïong jong mynta u snem.
Ka Benfica ka la kamai 87 point na ki 34 tylli ki jingïalehkai bad ka Porto ka la kamai 85 point na ki 34 tylli ki jingïalehkai.
