Shillong, Jymmang 28:
Ki pulit ka East Jaiñtia Hills ha ka Sngi U Blei ki la ïoh kurup jan 100 kilo u Kynja (Ganja) na ki arngut ki briew kiba dei na ka jylla Tripura.
U Additional SP ka East Jaiñtia Hills, u Bah Banraplang Jyrwa, ha u kyrwoh khubor, u la ong ba mynta ka sngi ha ka por kumba 3:00 nohphai sngi, kawei ka kali Santro kaba don ïa u nombor AS-06-J-5971 kaba dang wan na ki thaiñ Assam, ka la shah ai dak ha ki pulit ban sangeh ha Damcherra, Umkiang, NH-06.
Hynrei uwei na kiba shong ha ka kali, u la rynsied na ka kali bad ïoh ban phet krad.
Ha ka jingkhynra ïa ka kali hapdeng ka jingdon ki sakhi, u Bah Banraplang u la ong ba ki pulit ki la ïoh kurup ïa u Kynja, bad haba la thew, la shem ba u don 57.828 kilo.
Ha kaba ïadei bad kane ka jingjia, ki pulit ki la kem noh ïa uwei u briew ba la tip kyrteng kum u Alajit Debbarma, 24 snem ka rta, uba na Subalsingh distrik jong ka West Tripura.
Sa ha kawei pat ka jingjia, u Bah Banraplang u la ong ba ha ka por 6 baje janmiet jong ka Sngi U Blei, ki pulit ki la pynsangeh ïa kawei ka kali kaba don ïa u nombor AS-01-AT-6157 kaba dang wan na ka thaiñ Assam bad kaba thmu ban leit sha Khliehriat.
Ïa kane ka kali la pynsangeh ha Damcherra, Umkiang, NH-06. Ha ka jingkhynra ïa ka kali ha ka jingdon ki sakhi, la shem ïa u Kynja uba don 31.142 kilo.
Halor kane, ki pulit ki la kem ïa uwei u briew uba kyrteng u Pabitra Debbarma, 36 snem ka rta, uba dei na Kamalghat, West Tripura.
Ha kaba ïadei bad kitei ar tylli ki jingjia kurup Kynja, ki pulit ki la pynrung da ka jingujor ha thanat Lumshnong hapoh ki kyndon aiñ NDPS Act bad ka jingtohkit ka dang ïaid shakhmat ban lap sa ïa kiwei pat kiba donkti.
