B.M. Lanong
Haba nga ong ‘shen’, ngam mut shibnai-arbnai bad ngam mut pat ruh da ki snem, hynrei kan ym slem shuh ïa ngi, ban ngin ïoh shispah-na ka-shispah ïa ka bhah kam Sorkar ha Meghalaya, namar ki Garo ki la dawa ban phiah noh la kajong ka jylla, hadien ba ki sengbhalang na Garo Hills, ki la sdang dawa ïa kane bad ym shym don mano-mano ba pyrshah, wat ka Sorkar u Conrad Sangma ruh ka sngap jar-jar, kumba ong ki Phareng, ‘Silence means Consent’ (haba sngap jar ïa ka mat ïakren, ka mut ba don ka jingmynjur).
Ki samla KSU ruh la bun-bun snem ki la dawa ban pynbeit ïa kane ka mat ‘job-reservation’, naduh ba dang don u Myntri Rangbah banyngkong ka jylla, u Capt. Williamson A. Sangma. 50 tylli ki snem ki la ïaid bad la biang hi ka jingmyntoi ba la ïoh ki samla na Garo Hills.
La ïathuh ïa ngi ha kitei ki snem da ki rangbah jong kitei ki por, kynthup ïa i Bah B.B. Lyngdoh, P.R. Kyndiah bad kiwei de, ba u Capt. Sangma, ha ka jingshisha, u la don jingsngew ïa ka jingdawa ki samla KSU, u la sdang pynwandur ruh ïa ki nongrim, kiba pyrshang pynkhih ïa kane ka mat (draft), hynrei kitei hi ki Rangbah ki ïathuh, ba u la kren pat ha ki ba ‘ïa mynta, ieh ngin nang buh teng shuwa’ (keep in abeyance) ka la shu kut noh hangta.
Mynta ba la ai lyer thymmai da ka Seng VPP i Bah Ardent Basaïawmoit MLA, ha kaba la ïeng syndon da ka prokram ‘shah thngan’ (hunger strike), khlem artatien kan nang pynsted shuh-shuh ïa kaei kaba la ïakhih teng bad ba la nang ïai pyrkhat da ki bor Sorkar ruh.
Ka jingbym pynpaw ei-ei na ka liang ki Heh ka Sorkar NPP, ka sakhi ba u Myntri Rangbah, Conrad Sangma, un ym nud ban ïaid pyrshah ïa ka jingdawa ïa ka State Garo Hills, khamtam haba ka sur ka la mih na Garo Hills hi.
Imat ha u 2028 te kan mih ka jylla thymmai na ka bynta ka Garo Hills, namar ha baroh kawei ka Garo Hills, don 24 ngut ki MLA, kaba la biang na ka bynta jong ki ban ïoh jylla, khamtam ynda pynbun sa ïa ki konstitwensi.
Ki paid Garo kiba bun kiba don la slem ha thaiñ West Khasi Hills bad Ri-Bhoi, ym tip naei ki wan, kin dang don hi ha ka jylla Khasi Hills, tangba ïa ka bhah bate kam te la sngewthuh lypa, ba kan ym long shuh kumjuh.
