Chennai, Jymmang:
Ka AMM Foundation kaba long ka kompani kaba ju kner ia ki jingiarap jong ka Murugappa Group bad kumjuh ruh ka shlem ba khlain bor tam jong ka kam ialehkai phutbol ha Germany ka Borussia Dortmund (BVB) ki pynbna mynta ia ka jingiatehlok hapdeng jong ki ka ban sdang naduh u ‘nai Naitung mynta u snem.
Kumta lyngba katei ka jing-iatehlok hapdeng jong ki, ka AMM Foundation kan kylla long ka paralok jong ka Dortmund ha ka jingkyntiew ia ka kam ialehkai phutbol sha ki samla ha ri India baroh kawei.
Katei ka kompani na India kan khur ruh ia ka jingiohnong na katei ka klob kaba na Germany bad kumjuh ruh ha ki thain jong ka shlem ai jinghikai bad jingai jinghikai kaba naduh tyllong na ka bynta ban kyntiew ia ki nongialehkai, ka jingai jinghikai sha ki Coach, Organisational Planning bad ka kyntiew kaba jlan ha kaba iadei bad ka Infrastructure.
Na ka liang jong u Managing Director ka BVB Asia Pacific u Suresh Letchmanan u iathuh ba mynta ki iasam ia kajuh ka thong na ka bynta ban pyntyllun shakhmat ia ka kam ialehkai khamtam eh ka jingialehkai phutbol kaba long ka atiar kaba skhem bad ba jwat bha na ka bynta ban wan rah ia ka jingseisoh bad ka jingkylla ha ka imlang-sahlang.
Kumta da kaba iasnohktilang mynta bad ka AMM Foundation bad MYFA, ka synjuk jong u ka don ia ka thong na ka bynta ban iai pynneh pynsah ia ka jingim jong man la ki nongialehkai khamtam eh kito kiba wan na ka longing kaba duna ka ioh-ka-kot ha baroh shi lynter jong ka ri India.
Kumba ka paw hi ka long ba ka AMM Foundation ka lah iai pyntyllun shakhmat ia ka MYFA naduh u snem 2015 ha baroh shi lynter jong ka thain Chennai na ka bynta ban pynphriang ia ka dor kaba kordor sha ki samla. Ha shuwa ban poi sha katei ka jingiateh kaba mynta, ka kynhun na ka BVB ka lah dep ban leit jngoh ruh ia ka MYFA ha u bnai Rymphang na ka bynta ka Preliminary Camp kaba lai sngi.
