Shillong, Jymmang 28:
U Jingjang D Shira uba kam ïalade lyngba ki lad pathai khubor ba u dei uta u ‘Chief Executive Director’ bathymmai ka kynhun kieng atiar Garo National Liberation Army (GNLA) lem bad arngut kiwei pat, ki la leit pyndem hakhmat ki pulit ka West Garo Hills ha ka Sngi U Blei bad hadien kata, la kem noh ïa ki.
Ha ka Sngi Saitjaiñ, ka la don ka jingpynsaphriang ïa ka khubor lyngba ka WhatsApp ha kaba la kam ba uta u Jingjang u dei u Chief Executive Director ka GNLA, bad ba 500 ngut ki dkhot ki la rung sha kane ka seng bad la ai jinghikai ïa ki ha Rengdim ha West Khasi Hills kaba don marjan bad ka East Garo Hills bad South Garo Hills distrik.
Nalorkata, ka la don ruh ka jingpynsaphriang ïa ki dur ki dar jong u Jingjang bad la kam ruh ba ha kita ki dur, la don lang sa u Nengsrang Sangma uba dei u Secretary bad Second-in-Charge ka GNLA.
Mar ïa mih kine ki khubor, ki pulit ki la pynlong ïa ka jingtohkit bad la lap ba uta uba la ai kyrteng u Jingjang D Shira u dei u Namchang Ch. Momin, 22 snem ka rta, uba na ka shnong Darangagre. Nalor jong une, la don sa u Adot M Sangma, 26 snem ka rta, na ka shnong Ganipara bad u Silwit R. Marak, 26 snem ka rta, na ka shnong Nalnapara. Kine baroh ki shnong ki hap hapoh ka jingpeit ka thanat Dalu ha West Garo Hills.
Na ka liang ki pulit ki la pynlong ruh ïa ka jingthwet ban ïoh kem ïa kitei lai ngut bad ki la leit sha ka shnong Darangagre. Hynrei shiteng lynti, ki la ïoh jingtip noh ba kitei baroh lai ngut ki la leit pyndem hi ïalade ha thanat Kherapara.
Kita ki pulit kiba la leit thwet sha Darangagre ki la leit phai sha thanat Kherapara, bad ki la ïoh ban ïakren bad tih bniah na kitei ki lai ngut.
Ha kajuh ka por, ki pulit ki la leit khynra ïa ka ïing jong u Jingjang bad ki la lap ïa ki sopti kiba long rong jyrngam, ki juti bad kiwei.
Na ka liang ki pulit, ki la kem noh syndon ïa kitei baroh lai ngut.
Shuh shuh ki pulit ki la ong ba ki la dep ban pyntikna ba kam don satia ka jingpyrshang ban pynkhie im ne pynkhlaiñ biang ïa ka kynhun GNLA. Ki la ong ba kitei lai ngut kiba la shah kem ki la pynpaw ba ki dei kita ki GNLA tang ban ïoh pyntieng pynsmiej ïa ki paidbah bad khnang ba kin ïoh ban dawa pisa na ki heh saipan.
Nalorkata, ki pulit ki la ong ba ki lah ban don sa kiwei pat kiba donkti lang bad kitei lai ngut, bad namarkata, ka jingtohkit ka dang ïaid ban lap sa ïa kita kiwei.
Kumta na ka liang ki pulit ki la buh ka jingkyrpad sha ki paidbah ba kin wan shakhmat ban pyntip lada ki ïohsngew khubor eiei kaba ïadei bad ki kam lehnoh. Ki la ong ba ïa ki kyrteng jong kiba wan ai jingtip yn buhrieh.
