Aizawl, Jymmang:
Ka tnat shipai Assam Rifles ha ka jingpyllait kyrwoh ha ka 26 tarik mynta u bnai ka la pyntip ba ka la tei ïa kawei ka jaka treikam kaba shipor ha ka jingkieng Tuivai (khappud Mizoram – Manipur) na ka bynta ban khmih bniah ïa ki jinglong jingman bad kumjuh ruh ban tehlakam ïa ka shong suk shong saiñ ha katei ka thaiñ khappud hadien ka jingmih jong ki jingïakajia bad jingïaumsnam kiba jur ha ka jylla Manipur.
Kat kum ka kyrwoh la ïathuh ba ha ka Sngi Thohdieng, na ka liang ki bor ba halor jong ka tnat shipai ki la leit ruh ban pynlong ïa ka jingïalang syllok bad ki nongmihkhmat jong ka village council kumjuh ruh ba ki nongmih khmat jong ka seng YMA kiba na ka thaiñ Khawdungsei bad Khakhawn ban ïakren halor ki mat kiba ïadei bad ka jingtei ïa ka jaka treikam ba shipor.
Kat kum ka kyrwoh la ïatuh ba ka daw kaba hakhmat eh ba la tei ïa katei ka jaka treikam kaba shipor ka long ban pynbiang ïa ki lad jingïada na ka bynta ki nongshong shnong ka jylla Manipur ki ba wan ban wad jaka rieh tngen ha ka jylla Mizoram bad kumjuh ruh na ka bynta ban khanglad ïa ka rung ka mih jong ki dkhot seng kieng atiar bad ïa ka jingkhaïi beaiñ ïa ki tiar siat.
Kat kum ki jingïoh lum khubor la ïathuh ba na ka liang ki karikor bad ki nongtrei jong ka NHIDCL ki la dep ruh ban maramot ïa ka jingkieng Tuivai. Na ka liang ka tnat shipai ka la pyntip ba katei ka jingkieng ka dei kawei na u budlum jong ki nongshnong shnong ka thaiñ ba shathie jong ka jylla Manipur khamtam na ka thaiñ Churachandpur namar ba ïa baroh ki lad jingïarap kiba ïadei bad ki mar ki mata la wan ban pynpoi lyngba katei ka jingkieng na shilliang pud jong ka jylla Mizoram.
Na ka liang ka tnat shipai ka la pyntip ruh ba ka la ïoh lum jingtip ba ki la don ki dkhot ka seng kieng atiar Zomi Revolution Army (ZRA) kiba na ka thaiñ Churachandpur district kiba la don bynta ban lum khajna beaiñ na ki kali kiba leit ban pynpoi mar sha ka thaiñ Churachandpur.
Shuh shuh kat kum ka kyrwoh ba la pyllait da ka tnat shipai, ka la pyntip ruh ba ki shipai ka Assam Rifles ki la lah ruh ban leit shaw ïa ki 188 ngut ki nongtrei jong ka National Highways & Infrastructure Development Corporation Limited (NHIDCL) kiba la sahkut bad shah bat ha ka thaiñ Sinzawl, Manipur.
