Shillong, Jymmang 28:
Ka Khasi Students’ Union (KSU), Sengkmie, ha ka Sngi U Blei ka la leit ban ai mynsiem ïa u President rangbah ka Voice of the People Party (VPP), Bah Ardent M. Basaïawmoit uba shong shah thngan hakhmat Additional Secretariat, Shillong mynta la 6 sngi kynthih halor ka mat jingdawa ban khmih bniah ïa ka bhah thung kam ne ka ‘Reservation Policy’.
“Kum ka seng lada dei ïano-ïano ruh kiba shim ïa ka mat kaba ktah ïa ka jaidbynriew, ngi ai ka kti kamon, ka kti kadiang bad ngi ai jingkyrshan ïa ki,” la ong u President ka KSU, Sengkmie, samla Lambokstarwell Marngar haba kren sha ki lad pathai khubor hadien ka jingkhublei kitbok kitrwiang ïa u Bah Basaïawmoit.
Haba kdew ba kane ka jingïakhih kam dei shuh ka sien banyngkong, u la ong ba ka seng ha kane ka kynti ka sngew burom ïa une u rangbah uba mih shakhmat ban shim ïa kane ka sienjam.
“Ngi dei ki khun ka Bri u Hynñiewtrep, ngi shim ïa ka bynta ban ai ka kti kamon, ka kti kadiang bad ngi shaniah tylli ha kine ki rangbah ban pyntyllun ïa ka kam. Ha kajuh ka por, ka Sorkar ka dei ban sngewthuh bad sngap ïa ka sur u paidbah ha Bri u Hynñiewtrep,” u la ong.
Haba pynpaw ba ka Sorkar kam dei shuh ban dang kuman ne leh kyllut halor katei ka bynta, u President u la ong, “Wat ym ai lad ba ka ding kan klang, wat nym ai lad ba ka jingbitar jong ki samla kan long da kumwei pat. Pynbeit ïa kane ka kam na bynta ka jingbha, jingbeit bad ka jinghun jong ki samla, ki kmie ki kpa hapoh ka Bri u Hynñiewtrep baroh kawei.”
Nangta, u la ong ruh ba ka Sorkar MDA-II ka kynthup ym tang ïa kita ki seng-heh ka ri, hynrei ïa ki seng ’riewlum. Kumta lada ka (Sorkar) don ka jingkitkhlieh na bynta ka lawei, ka pateng ka ban wan, ka dei ban khot ïa une u rangbah (Ardent) lem bad ka kynhun jong u sha ka miej jingïakren.
“Ha ka kynhun u Bah Ardent, ki don ki khraw pyrkhat, ki don kiba la shemphang, kiba la nang la stad. Khot sha ka miej jingïakren bad ïathir-ïatai khamtam kumno ban pynwandur ïa kane ka ‘Reservation Policy’ kumba ki paidbah ki angnud bad khmih lynti. Dei ban khmih bniah bad pynthymmai sa shisien na bynta ka jingmyntoi jong uba bun balang khamtam jong ki samla ka jaidbynriew,” u la ong.
Shuh shuh halor ka komiti ba la thaw da ka Sorkar, utei u nongïalam u la bynrap ba kane ka komiti ka long beit thik tang na bynta ka ‘Roster System’, hynrei kum ka seng ka kwah ba ka Sorkar kan ïakren ïa ka ‘Reservation Policy’.
“Ngi dang ïaishah bad ngi dang ïai ap bad ngi khmih lynti ba ka Sorkar kan sngewthuh ïa kata,” u la ong.
