London, Jymmang:
Katkum ka khubor ba lah ioh lum ka iathuh ba ka kynhun ialehkai Hockey jong ki shynrang ka ri kaba iashim bynta ha ka lympung FIH Men’s Hockey Pro League, ka la mad noh ia ka jingshah pynrem da 1-2 kol ha ka jingiakhun pyrshah bad ka kynhun lahduh Olympic ka Belgium, wat la katei ka kynhun ialehkai na India ka lah ioh ban khur ia katei ka shi kol ha shuwa ba ka por ialehkai kan kut noh.
Kumta ha kaba iadei bad katei ka bynta jong ka jing-iakhun hapdeng ki ar kynhun, baroh ki kol ha ka jingialehkai ba la khur da ki kynhun ki wan lyngba ka PCs (Penalty Corners). Ka Belgium kaba dei ka kynhun kaba dang iai bat ia ka kyrdan ba ar ha ka pyrthei bad kaba lah mih shakhmat na ka bynta ban khur ia ka kol ba nyngkong na ka jingialehkai ha ka 18min lyngba u rangialehkai jong ka u Thibeau Stockbroekx, ha shuwa ba ka India kan lah ban pyniaryngkat kol ha ka 25 min ialehkai ba lah pynioh da u Mandeep Singh.
Hynrei ha ka jingialehkai ka kynhun defence jong ka India ka lah khyllem noh ha ki minit ialehkai ba khatduh jong ka jingialehkai; ha kaba ka lah pynlehnohei ruh wat ia ki katto katne ki PCs ba ka kynhun ka lah ioh ban tied bad kata ka long kawei ia kaba lah pynkylla kol da u Nelson Onana ka Belgium ha ka 60min ialehkai.
Watla ka jingialehkai ka long kaba lah khluid ha shuwa ba ka por ialehkai kan kut noh ha kaba baroh ar kynhun ki la lah ban pyniadei ka rukom ialehkai hapdeng jong ki bad ba ka India ka lah ioh ia ka lad kaba nyngkong na ka bynta ban thep kol; kata ha ka san min ialehkai, hynrei ka jingiohlad u Hardik Singh ban tied ia ka bol na ka bynta ban pynrung ia sha ka kol na ka jylli ialehkai kam shym la long kaba seisoh hadien ba la lah ban tem noh da u rangapkol ka Belgium u Loic van Doren.
Ha ki khyndiat sekhon na ka quarter iakhun kaba nyngkong, ka Belgium ka lah ioh ban tied ia ka PC, hynrei la lah ban tem ia ka da ka kynhun ialehkai shadien ka India. Shuh shuh ruh ka Belgium ka lah ioh biang sa shisien na ka bynta ban tied ia ka PCs ha ka 18min ialehkai bad ha kaba u Stockbroekx u la lah ban pynpra noh ia ka kynroh bakhlain jong ka India na ka sien kaba ar kaba u lah ioh ban tied.
Ha ka jingialehkai, ka lah shimpor hynniew minit ia ka kynhun ialehkai ka ri na ka bynta ban wanrah sha ka jingiaryngkat kyrdan ha ka jingthep kol lyngba u Mandeep uba lah tied pynrung ia ka bol hadien ba u kapten ka kynhun u Harmanpreet Singh u lah tied pyndei ia ka bol na ka PCs. Ar minit ha ka quarter iakhun kaba lai, ka Belgium ka lah iohlad biang sa shisien ban thep kol, hynrei kam shym la lah ban pynurlong.
Ha ka 45min ialehkai, ka Belgium ka lah ioh sa kawei ka PCs hynrei kaba lah shah tem noh ha ka kynhun defence jong ka India.
Kumjuh ruh ka India ka lah ioh katto katne ki lad kiba biang na ka bynta ban tam kol shakhmat ia ka tei ka kynhun iakhun pyrshah, hynrei ki jingialeh jong u Sukhjeet Singh & Gurjant Singh na ka bynta ban pynurlong sha ka kynhun kam shym la seisoh hadien ba la lah ban tem ia ka bol ba ki lah tied da ka kynhun iada kaba khlain jong ka Belgium.
Dei ha ka minit ialehkai ba khatduh ba ka India ka lah shah pynjem noh ia ki khnap ialehkai jong ka tad haduh ba kan da mad syndon ia ka jingshah pynliem ha kaba kut.
