Shillong, Jymmang:
Ka Dorbar Shnong Jaiaw Laitdom da ka jingïapynbeit lang bad ka tnat puit pynïaid kali (traffic police), ka la pynbeit ba ka ‘No Entry’ sha Jaiaw St. Joseph kan long naduh ka por 8 baje mynstep haduh ka por 8 baje mynmiet. Lait noh ki ar shaka. Ïa ka ‘signboard’ la thoh na baroh arliang ki kynroh jong ka surok. Hynrei kaba sngewsih ka long ba bun na ki nongñiah kali ki pynkheiñ ïa ka kyndon ‘No Entry’ da ka bym peit bad burom ïa kane ka jingpynbeit. Kumta la kyrpad ïa baroh ki
nongñiah kali ba kin da peit ïa ki ‘signboard’ ba la thoh ‘No Entry’ khnang ban lait na kino kino ki jingjia ïatakhuh kali bad kumjuh ruh ban lait na ka jingdheng kali. Lada lap ïa kiba pynkheiñ ïa ka kyndon ‘No Entry’, ka Dorbar Shnong ka hap ban leh la ka jong ka kamram. Katei ka long kat kum ka kyrwoh ba la phah da u Bah H.S Suting – General Secretary ka Dorbar Shnong Jaiaw Laitdom.
